30.10.2026 | 20:18
Միրզոյանը Բահրեյնում կմասնակցի «Մանամայի երկխոսություն» անվտանգության ֆորումին
Ադրբեջանի Պետանվտանգության ծառայությունն անհանգստացած է, որ Հայաստանը ժամանակակից զինատեսակներ է ձեռք բերում ու բարեփոխում բանակը
Քաղաքականություն
24.11.2022 | 21:00
Ադրբեջանի Անվտանգության խորհրուրդն այսօր Բաքվում կազմակերպել է «Արցախյան 44-օրյա պատերազմի փորձը» թեմայով համաժողով, գրում են ադրբեջանական լրատվականները։
Նշվում է, որ միջոցառմանը մասնակցել են Անվտանգության խորհրդի քարտուղար, գեներալ-գնդապետ Ռամիլ Ուսուբովը, ՊՆ ղեկավար Զաքիր Հասանովը, Պետական անվտանգության ծառայության պետի առաջին տեղակալ, գեներալ-լեյտենանտ Ջեյհուն Շադլինսկին, Հատուկ կապի և տեղեկատվական անվտանգության պետական ծառայության պետ, գեներալ-լեյտենանտ Իլգար Մուսաևը, Ռազմավարական օբյեկտների պաշտպանության պետական գործակալության ղեկավար, գեներալ-մայոր Իլգար Աբասովը, Ադրբեջանի ԶՈՒ ԳՇ պետ Քերիմ Վելիևը, իրավապահ և այլ պետական մարմինների բարձրաստիճան պաշտոնյաներ, Թուրքիայի ԶՈՒ ԳՇ և ազգային անվտանգության խորհրդի գլխավոր քարտուղարության ներկայացուցիչները, այդ թվում՝ Ադրբեջանում Թուրքիայի ԶՈՒ հատուկ նշանակության խմբավորման հրամանատար, գեներալ-գնդապետ Բախթիյար Էրսայը։
Ի դեպ, Էրսայն Արցախյան 44-օրյա պատերազմի կարևոր դերակատարներից է․ նա պատերազմի ամբողջ ընթացքում Ադրբեջանում է եղել, ծրագրել ու ղեկավարել է ռազմական գործողությունները։
Ըստ երևույթին, առանց Թուրքիայի ԶՈւ-ի ներկայացուցիչների մասնակցության Ադրբեջանում անվտանգությանն ու պաշտպանական ոլորտին առնչվող որևէ միջոցառում այլևս տեղի չի ունենում։
Միջոցառման ընթացքում Պետական անվտանգության ծառայության պետի առաջին տեղակալ, գեներալ-լեյտենանտ Ջեյհուն Շադլինսկին անհանգստություն է հայտնել, որ Հայաստանը մեծ միջոցներ է տրամադրում ժամանակակից սպառազինության ձեռքբերման և բանակաշինության համար։
«Հայաստանում ռևանշիստական ուժերն ամեն կերպ փորձում են խոչընդոտել երկու երկրների հարաբերությունների կարգավորմանն ուղղված ջանքերին»,- ասել է նա ու հավելել՝ մտահոգիչ է այն փաստը, որ Հայաստանը սպառազինության և բանակաշինության համար հատկացնում է իր հնարավորությունները գերազանցող ֆինանսական միջոցներ, փորձեր անում գնել տարբեր երկրներից ռազմական նշանակության ժամանակակից զենք ու տեխնիկա և, իբր, ձգտում է ամեն կերպ ձգձգել խաղաղության պայմանագրի ստորագրումը։
Ի դեպ, նա նաև նշել է, թե հատուկ ուշադրություն է գրավում այն, որ ռազմական տեխնիկա է տեղափոխվում Արցախ։
Էմմա Չոբանյան
