27.02.2026 | 09:02
Նիկոլ Փաշինյանն ու Աննա Հակոբյանը բաժանվել են
ՀՀ ԳԱԱ երիտասարդ գիտնականները՝ «Գիտություն առանց սահմանների» ֆորումի մրցանակակիրներ
Հասարակություն
23.11.2022 | 13:44
ՀՀ Գիտությունների ազգային ակադեմիայի երիտասարդ գիտնականները դարձել են ԱՊՀ անդամ երկրների երիտասարդ գիտնականների «Գիտություն առանց սահմանների» ֆորումի մրցանակակիրներ: Ֆորումն անցկացվել է Ռուսաստանի Դաշնության Նիժնի Նովգորոդ քաղաքի Լոբաչևսկու անվան պետական համալսարանում: Այն 2024 թվականին կայանալիք Ռուսաստանի Գիտությունների ակադեմիայի 300-ամյակին նվիրված մեծ ծրագրի մի մասն է․ տեղեկացնում են ՀՀ ԿԳՄՍՆ-ից։
Հայաստանը ֆորումին ներկայացել է 21 հոգանոց պատվիրակությամբ: ՀՀ Գիտությունների ազգային ակադեմիայի համակարգի ինստիտուտների երիտասարդ գիտնականները զեկուցումներով հանդես են եկել ֆորումի «Արհեստական ինտելեկտ», «Նոր նյութեր», «Հարմարավետ միջավայր», «Առողջ սերունդ», «Պարենային անվտանգություն», «Ժառանգության պահպանում» և «Մոլեկուլային ճարտարագիտություն» սեկցիաներում:
Սեկցիաների աշխատանքի արդյունքների հիման վրա ֆորումի կազմկոմիտեն որոշել է յուրաքանչյուր սեկցիայում առաջին, երկրորդ և երրորդ հորիզոնականների մրցանակակիրներին: Երեսուն մրցանակակիրներից հինգը ՀՀ ԳԱԱ համակարգի ինստիտուտների երիտասարդ գիտնականներ են: Առաջին հորիզոնականի մրցանակի են արժանացել ՀՀ ԳԱԱ Մ. Աբեղյանի անվան գրականության ինստիտուտից Աստղիկ Սողոյանը («Ժառանգության պահպանում» սեկցիա), ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոնից Շուշանիկ Դաշյանը («Մոլեկուլային ճարտարագիտություն» սեկցիա) և ՀՀ ԳԱԱ Մոլեկուլային կենսաբանության ինստիտուտից Միքայել Կարապետյանը («Առողջ սերունդ» սեկցիա): Երկրորդ հորիզոնականի մրցանակի է արժանացել ՀՀ ԳԱԱ Մ. Մանվելյանի անվան ընդհանուր և անօրգանական քիմիայի ինստիտուտից Ջուլիա Եգանյանը («Նոր նյութեր» սեկցիա): Երրորդ հորիզոնականի մրցանակի է արժանացել ՀՀ ԳԱԱ Լ. Օրբելու անվան ֆիզիոլոգիայի ինստիտուտից Վահան Գրիգորյանը («Առողջ սերունդ» սեկցիա):
Ֆորումին մասնակցել է 384 գիտնական ԱՊՀ անդամ երկրներից՝ Հայաստանից, Ռուսաստանից, Բելառուսից, Ղազախստանից, Ղրղզստանից, Թուրքմենստանից, Ուզբեկստանից, Տաջիկստանից, Ադրբեջանից, ինչպես նաև ԱՊՀ անդամ չհանդիսացող երկրներից՝ Իրանից, Հնդկաստանից, Չինաստանից, Չեռնոգորիայից, Լիբիայից։ Ֆորումի մասնակիցները հանդես են եկել 250 գիտական զեկուցումներով:
Ֆորումի կազմակերպիչներն են Ռուսաստանի Գիտությունների ակադեմիան, ԱՊՀ գործադիր կոմիտեն, ՌԴ գիտության և բարձրագույն կրթության նախարարությունը, Նիժնի Նովգորոդի մարզի կառավարությունը, Լոբաչևսկու անվան համալսարանը և «Սկոլկովո» հիմնադրամը:
