ԱՄՆ-ը հայտարարել է, որ պատրաստ է աշխատել Ղազախստանի նորընտիր նախագահի հետ

Վաշինգտոնը պատրաստ է աշխատել Ղազախստանի նախագահական ընտրություններում հաղթած Կասիմ-Ժոմարտ Տոկաևի հետ, թեև ընտրական գործընթացն անցել է ոչ բավարար մրցակցության պայմաններում։ Այս մասին հայտարարել են ԱՄՆ Պետքարտուղարությունից։

«Մենք ակնկալում ենք աշխատել նախագահ Տոկաևի և նրա կառավարության հետ՝ մեր ընդհանուր նպատակներն առաջ տանելու համար»,- ասվում է ԱՄՆ արտաքին քաղաքական գերատեսչության հաղորդագրության մեջ:

Ղազախստանում նոյեմբերի 20-ին տեղի են ունեցել արտահերթ նախագահական ընտրություններ։ Կենտրոնական ընտրական հանձնաժողովի վերջնական տվյալների համաձայն՝ երկրի գործող ղեկավար Կասիմ-Ժոմարտ Տոկաևը հաղթել է ձայների 81,31%-ով։ Ընտրողների ընդհանուր մասնակցությունը կազմել է 69,44%:

Նշվում է, որ Միացյալ Նահանգները կիսում է ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) նախնական գնահատականները, որ թեև ընտրությունների օրն անցել է հանգիստ մթնոլորտում, սակայն գործընթացում ինքնին բացակայում էր «էական քաղաքական մրցակցությունը», բացի այդ՝ այն ուղեկցվում էր «հավաքների և կարծիքի արտահայտման ազատության սահմանափակմամբ»։

Միացյալ Նահանգները կոչ է անում Ղազախստանի կառավարությանը՝ ապագա ընտրություններում հետևել ԺՀՄԻԳ-ի առաջարկություններին, ներառյալ՝ 2023 թվականին կայանալիք խորհրդարանական ընտրությունները։

ԱՄՆ-ն աջակցում է Տոկաևի առաջարկած բարեփոխումներին և հորդորում է կառավարությանը դրանք ամբողջությամբ իրականացնել, նշում է Պետքարտուղարությունը։

Տաթև Ֆռանգյան