ՌԴ-ն Թուրքիային զսպման կոչ է անում՝ Սիրիայում էսկալացիա թույլ չտալու համար

Ռուսական կողմը թուրք գործընկերներին զսպվածության կոչ է անում՝ Սիրիայի ամբողջ տարածքում հետագա էսկալացիան թույլ չտալու համար։ Այս մասին հայտարարել է ՌԴ նախագահի Սիրիայի հարցով հատուկ ներկայացուցիչ Ալեքսանդր Լավրենտևը, գրում է ՏԱՍՍ-ը։

«Մենք մեր թուրք գործընկերներին որոշակի զսպվածության կոչ կանենք՝ թույլ չտալու էսկալացիա ոչ միայն հյուսիսում, այլև Սիրիայի ամբողջ տարածքում։ Մենք կարծում ենք, որ աշխատանքը բոլոր շահագրգիռ կողմերի հետ պետք է շարունակել ու փորձել գտնել որևէ ճիշտ լուծում, այդ թվում, այսպես կոչված, քրդական հարցի հետ կապված»,- ասել է նա Սիրիայի կարգավորման հարցով Աստանայի ձևաչափով միջազգային հանդիպման մեկնարկից առաջ։

Ռուս դիվանագետը նաև հիշեցրել է, որ թուրքական վերջին ռազմաօդային գործողությունը հիմնվել է Ստամբուլում տեղի ունեցած պայթյունի վրա, որի հետևանքով զոհվել է 6, վիրավորել՝ ավելի քան 80 մարդ։ Այնուհետև հարձակման մեջ կասկածվողը խոստովանել է, որ կապեր ունի Թուրքիայում արգելված Քուրդիստանի աշխատավորական կուսակցության (PKK) հետ, որը Սիրիայում ունի «Ժողովրդական ինքնապաշտպանության ուժեր» կոչվող ճյուղ:

«ՌԴ-ն վերջին ամիսներին, երբ Թուրքիայի նախագահ Ռեջեփ Թայիփ Էրդողանն ասել էր Սիրիայում գործողության իրականացման մտադրության մասին, արել է հնարավոր ամեն ինչ, որ դա տեղի չունենա, նրա համար, որ կանխի որևէ բանակի լայնամասշտաբ հարձակվողական  գործողություն գետնի վրա։ ՌԴ-ին հաջողվել է դա անել, և մենք  հուսով ենք, որ կհաջողվի համոզել մեր թուրք գործընկերներին՝ զերծ մնալ Սիրիայի տարածքում ուժի չափազանց կիրառումից»,- ասել է Լավրենտևը։

Հավելենք, որ Թուրքիայի ռազմաօդային ուժերն Իրաքի ու Սիրիայի հյուսիսում ռազմաօդային գործողություն էին իրականացրել, իբր, քուրդ զինյալների դեմ, որի հետևանքով սպանվել են տասնյակ խաղաղ բնակիչներ, թիրախավորվել քաղաքացիական բնակավայրեր։

Էմմա Չոբանյան