16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Իրանը հարվածներ է հասցրել Իրաքի հյուսիսում քուրդ-իրանական ընդդիմադիր խմբավորումների դիրքերին
Քաղաքականություն
21.11.2022 | 19:14
Իրանը նոյեմբերի 20-ի լույս նոյեմբերի 21-ի գիշերը հարվածներ է հասցրել Իրաքի հյուսիսում իրանա-քրդական ընդդիմադիր խմբավորումների դիրքերի վրա, գրում է DW-ի ռուսական ծառայությունը։
«Իրանի Իսլամական հեղափոխության պահապանների կորպուսը հերթական անգամ ռմբակոծել է իրանա-քրդական կուսակցությունների դիրքերը»,- հայտնել է Իրաքի Քուրդիստանի ինքնավար շրջանի հակաահաբեկչական գործակալությունը՝ չհստակեցնելով՝ արդյո՞ք զոհեր կան։
Իրանական Քուրդիստանի դեմոկրատական կուսակցությունը (PDKI) և ազգայնական իրանա-քրդական Komala կազմակերպությունը հայտարարել են, որ իրենք հայտնվել են Իրանի թիրախում։
«Այս անկանոն հարվածները տեղի են ունենում այն ժամանակ, երբ Իրանի ահաբեկչական ռեժիմը չի կարողանում կանգնեցնել իրանական Քուրդիստանում շարունակվող բողոքի ակցիաները»,- ասվում է PDKI-ի Twitter-ի միկրոբլոգում հրապարակված հաղորդագրությունում:
Նոյեմբերի 21-ի առավոտյան Իրաքի պետական INA լրատվական գործակալությունը հայտնել է նաև իրանական անօդաչու թռչող սարքերի կիրառման և հրթիռային հարվածների մասին Իրաքյան Քուրդիստանում երեք «իրանական ընդդիմադիր կուսակցությունների» վրա։ Նույն թիրախների դեմ նմանատիպ հարվածներ են հասցվել մեկ շաբաթ առաջ։
Թեհրանը Հյուսիսային Իրաքի իրանա-քրդական խմբավորումներին մեղադրում է Իրանում հակակառավարական զանգվածային ցույցեր հրահրելու համար։ Իրանում երիտասարդ քուրդ կնոջ՝ Մահսա Ամինիի մահից ի վեր քրդական կազմակերպություններն աջակցել են Իրանում տեղի ունեցող բողոքի ցույցերին և սուր քննադատության են ենթարկել ցուցարարների նկատմամբ ճնշումները։
Տաթև Ֆռանգյան
