30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Էրդողանն ու Պուտինը հեռախոսազրույցում քննարկել են Ուկրաինան, հացահատիկային միջանցքն ու գազային հանգույցի ստեղծումը
Քաղաքականություն
18.11.2022 | 16:04
Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ՌԴ նախագահ Վլադիմիր Պուտինի հետ։ Թուրքական կողմի տարածած տեղեկատվության համաձայն՝ զրույցի ընթացքում քննարկվել են տարածաշրջանային հարցեր, հատկապես՝ Թուրքիա-Ռուսաստան հարաբերությունների զարգացումները և հացահատիկային միջանցքը։
Էրդողանը շնորհակալություն է հայտնել Պուտինին Ստամբուլյան հացահատիկային գործարքը 120 օրով երկարաձգելու հարցում կառուցողական դիրքորոշման համար։
Նշելով, որ ռուս-ուկրաինական պատերազմի երկարաձգումը կավելացնի ռիսկերը, այդ պատճառով դիվանագիտական բանակցությունները պետք է վերականգնվեն, Էրդողանը հայտարարել է, որ Ռուսաստանի և ԱՄՆ-ի հետախուզությունների ղեկավարների շփումները Թուրքիայում առանցքային դեր են խաղում դաշտում անվերահսկելի էսկալացիայի կանխման գործում։
Թուրքիայի նախագահը նաև գոհունակություն է հայտնել իր երկրում բնական գազի կենտրոն հիմնելու մասին ՌԴ նախագահ Պուտինի առաջարկի առնչությամբ և նշել, որ թիմերն անհրաժեշտ տեխնիկական, իրավական և կոմերցիոն գնահատականներ կտան՝ հնարավորինս շուտ ընդհանուր նպատակներին հասնելու համար։
Հավելենք, որ ավելի վաղ Էրդողանը ցանկություն էր հայտնել Պուտինին հանդիպել Բալիում անցկացված G20-ի գագաթնաժողովի շրջանակում, սակայն ՌԴ նախագահը միջոցառմանը չէր մասնակցել։
Էմմա Չոբանյան
