09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Գազայի հատվածում՝ փախստականների ճամբարում, հրդեհն ավելի քան 20 մարդու կյանք է խլել
Քաղաքականություն
18.11.2022 | 17:53
Գազայի հատվածում փախստականների ճամբարի բնակելի շենքերից մեկում բռնկված հրդեհի հետևանքով զոհվել է առնվազն 21 մարդ, այդ թվում՝ յոթ երեխա։ Այս մասին հայտնել է dpa գործակալությունը՝ վկայակոչելով տեղի հիվանդանոցի տնօրենին, գրում է DW-ի ռուսական ծառայությունը։
Գազայի իշխանությունների տվյալներով՝ հրդեհը բռնկվել է Ջաբալիյա փախստականների ճամբարում գտնվող տան վերջին հարկում, այնուհետև կրակը տարածվել է շենքի մնացած հատվածում։ Ներսում գտնվող բոլոր մարդիկ զոհվել են։
Արտակարգ իրավիճակների ծառայությունները նշել են, որ տանը, հավանաբար, մեծ քանակությամբ վառելիք է եղել, որը Գազայի հատվածի բնակիչները կուտակում են ձմռան համար։
Միջադեպի ստույգ պատճառը պետք է պարզի հատուկ ստեղծված հանձնաժողովը։ Ականատեսների վկայությամբ՝ տանն ապրող ընտանիքը նշել է արտերկրից ազգականի վերադարձը։
Իսրայելի պաշտպանության նախարար Բենի Գանցը Twitter-ում ցավակցություն է հայտնել միջադեպի կապակցությամբ։ Իսրայելն օգնություն է առաջարկել վիրավորներին տարհանելու և միջադեպի հետ կապված այլ հարցերում։ Ցավակցություններ ու օգնության առաջարկներ են ստացվել նաև Հորդանանից և Եգիպտոսից։
Տաթև Ֆռանգյան
