Պատերազմը պետք է ավարտվի բանակցությունների սեղանի շուրջ․ Ստոլտենբերգ

Հյուսիսատլանտյան դաշինքի ղեկավար Յենս Ստոլտենբերգը համոզմունք է հայտնել, որ Ռուսաստանի և Ուկրաինայի միջև պատերազմը կավարտվի խաղաղ բանակցություններով։ Չորեքշաբթի երեկոյան BBC-ին տված հարցազրույցում Ստոլտենբերգն նշել է, որ եթե Ուկրաինան դադարեցնի միակողմանի դիմադրությունը, ապա պարզապես կդադարի գոյություն ունենալ որպես անկախ և ինքնիշխան պետություն։ Ուստի՝ պատերազմը դադարեցնելու որոշումը, ըստ նրա, պետք է լինի փոխադարձ։

«Մենք բոլորս ցանկանում ենք խաղաղություն և բանակցային լուծում: Բայց, միևնույն ժամանակ, մենք պետք է հասկանանք, որ եթե Ռուսաստանը և նախագահ Պուտինը դադարեն կռվել, և Ուկրաինան նույնպես դադարեցնի կռիվը, ապա խաղաղություն կլինի», – ասել է Ստոլտենբերգը:

Այդուհանդերձ, նման մոտեցումը, ըստ BBC-ի,  մերժվում է Կիևում, քանի որ կարծում են, որ ռազմական գործողությունների դադարեցումը և խաղաղ բանակցությունների մեկնարկը կհանգեցնեն հակամարտության սառեցմանը, ինչը կզրոյացնի ուկրաինական զորքերի վերջին հաջողությունները, շփման նոր գիծ կստեղծի և Ռուսաստանին կտա անհրաժեշտ դադար՝ վերականգնելու իր մարտունակությունը և կրկնել ներխուժում իրականացնելու։ Ուկրաինայի նախագահ Վլադիմիր Զելենսկին պնդում է, որ Մոսկվայի հետ բանակցությունները հնարավոր են միայն այն բանից հետո, երբ բոլոր ռուսական զորքերը լիովին լքեն օկուպացված տարածքները։

«Ինչ-որ պահի այս պատերազմը, ամենայն հավանականությամբ, կավարտվի բանակցությունների սեղանի շուրջ, բայց մենք գիտենք, որ այդ բանակցությունների արդյունքը սերտորեն կապված է մարտի դաշտում ուժերի հավասարակշռության հետ»,- հավելել է ՆԱՏՕ-ի գլխավոր քարտուղարը:

BBC-ի թղթակցի հետ զրույցում Ստոլտենբերգը խոսել է նաև Լեհաստանի տարածքում պայթած հրթիռի հետ կապված միջադեպի մասին՝ ընդհանուր առմամբ կրկնելով նույն խոսքերը, որոնք օրվա ընթացքում հնչել են արևմտյան այլ առաջնորդներից։ «Պատերազմները վտանգավոր երևույթներ են, և սխալներ գրանցվում են»,-ասել է Ստոլտենբերգը՝ ձեռնպահ մնալով այս կամ այն կողմի հասցեին մեղադրանքներից։ Նրա խոսքով՝ ինչ էլ որ տեղի ունեցած լինի, Ուկրաինան ինքնապաշտպանվելու իրավունք ունի։

Տաթև Ֆռանգյան