Լծակ՝ ՀՀ իշխանության ձեռքին. Ֆրանսիայի Սենատի բանաձևի հնարավոր ազդեցությունը․ ՏԵՍԱՆՅՈւԹ

Հայաստանից և Արցախից միաձայն ողջունում են Ֆրանսիայի Սենատի ընդունած բանաձևը, որով այդ երկիրն աջակցություն է հայտնում Հայաստանին և առաջարկում պատժամիջոցներ կիրառել Ադրբեջանի դեմ: Գրեթե միաձայն ընդունված այս բանաձևը շրջադարձային նշանակություն ունի՝ հայտարարում է ՀՀ ԱԺ իշխանական պատգամավոր Արման Եղոյանը:

Բանաձևով Սենատը պահանջում է հեռացնել Ադրբեջանի Զինված ուժերը Հայաստանի սուվերեն տարածքից և հարգել Հայաստանի տարածքային ամբողջականությունն ու ինքնիշխանությունը, նաև կոչ է անում Ադրբեջանին՝ ազատ արձակել բոլոր հայ ռազմագերիներին:

Օրենսդիրը Ֆրանսիայի կառավարությանն առաջարկում է, եվրոպական գործընկերների հետ համագործակցաբար, պատասխան դիվանագիտական և տնտեսական միջոցներ նախատեսել Ադրբեջանի կողմից իրականացված ագրեսիան պատժելու նպատակով, այդ թվում՝ կիրառել պատժամիջոցներ, որոնք կթիրախավորեն Ադրբեջանի իշխանությունների ունեցվածքը, ինչպես նաև կնախատեսեն էմբարգո Ադրբեջանից գազի և նավթի ներկրման հարցում:

Սենատը նաև վերահաստատում է Լեռնային Ղարաբաղի Հանրապետության ճանաչման անհրաժեշտությունը և առաջարկում կառավարությանը՝ այնտեղ հիմնել հումանիտար գրասենյակ:

ԱԺ ընդդիմադիր «Հայաստան» խմբակցության պատգամավոր Արթուր Խաչատրյանը բանաձևը կարևորում է երկու տեսանկյունից: Նախ, ըստ նրա, կարևոր է այն, որ Ֆրանսիայի Սենատը հիշեցրեց Արցախի խնդրի մասին: Թեև ընդունված բանաձևը խորհրդատվական բնույթի է և պարտադիր չէ կատարման համար, այդուհանդերձ, ըստ Արթուր Խաչատրյանի, այն լուրջ լծակ է ՀՀ իշխանության համար:

Ֆրանսիայի Սենատի կողմից ընդունված բանաձևը ողջունում են նաև Ստեփանակերտից: Արցախի ԱԳ նախարարությունը բանաձևի ընդունումը կարևոր քայլ է համարում և՛ քաղաքական, և՛ իրավական, և՛ բարոյական տեսանկյունից։ Այդուհանդերձ, ԱՀ արտաքին գործերի նախարար Դավիթ Բաբայանը կարևորում է գործնական քայլերի իրականացումը:

Հատկանշական է, որ Արցախի անկախությունը ճանաչելու անհրաժեշտության վերաբերյալ մեկ այլ բանաձև Ֆրանսիայի Սենատն ընդունել էր դեռևս 2020 թվականին նոյեմբերին: Այն ժամանակ ևս Սենատը կոչ էր արել Ֆրանսիայի կառավարությունը ճանաչել Լեռնային Ղարաբաղի անկախությունը՝ տարածաշրջանում տևական խաղաղություն հաստատելու համար, սակայն որևէ քայլ ֆրանսիական կառավարությունը չարեց:

Սենատում այս քննարկմանը նախորդել էր Էմանուել Մակրոնի և Իլհամ Ալիևի հեռախոսազրույցը: Ըստ ադրբեջանական լրատվամիջոցների՝ Ալիևը հեռախոսազրույցի ընթացքում շեշտել է Հայաստանի և Ադրբեջանի միջև հարաբերությունների կարգավորման գործընթացում չեզոք, անաչառ և հավասարակշռված մոտեցման կարևորությունը։ Հնարավո՞ր է այս բանաձևի պատճառով Ադրբեջանը հրաժարվի Ֆրանսիայի միջնորդական առաքելությունից․ իշխանական պատգամավոր Արման Եղոյանը վստահ է՝ ցանկացած դեպքում Ֆրանսիան շարունակելու է իր քաղաքականությունը:

Երեկ ընդունված բանաձևին արդեն արձագանքել է Ադրբեջանը: Ըստ այդ երկրի ԱԳՆ-ի՝ Ֆրանսիայի Սենատի ընդունած բանաձևը հերթական անգամ «ի ցույց է դնում Փարիզի կողմնակալ քաղաքական դիրքորոշումը՝ որպես երկրի, որը մտադրություն է հայտնում նպաստելու հայ-ադրբեջանական կարգավորմանը»։

Մանրամասները՝ տեսանյութում։

Շողիկ Գալստյան