11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Պուտինը փախավ Խերսոնից՝ ծանր պարտվում է․ ատոմային շանտաժը չի գործել՝ վտանգ է սպառնում նրա կյանքին․ Ռուբեն Մեհրաբյան․ ՏԵՍԱՆՅՈՒԹ
Քաղաքականություն
16.11.2022 | 20:32
Ուկրաինայի դեմ ՌԴ-ի պատերազմը թեժ ընթացք է ստացել։ Խերսոնի մարզից նահանջելուց հետո ՌԴ-ն երեկ 100 հրթիռ է արձակել ուկրաինական քաղաքների ուղղությամբ։ Տասնյակից ավելի քաղաքների և շրջանների հարվածներ են հասցվել։ Սա Ուկրաինայի էներգետիկ ենթակառուցվածքները շարքից հանելուն ուղղված ամենաինտենսիվ հարձակումներից է։ Ուկրաինայի զինուժը կարողացել է որսալ հրթիռների մեծ մասը և չեզոքացնել։
Ինդոնեզիայում հավաքված G7-ի ղեկավարները դատապարտել են այս ակտը։ Ի դեպ, երեկ նաև ՆԱՏՕ-ի անդամ Լեհաստաի տարածքում է երկու հրթիռ ընկել։ Էրդողանն ասել է՝ ՌԴ-ն կապ չունի դրա հետ։
Բացի այդ, ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ միայն Ուկրաինան պետք է որոշի, թե ո՞ր պայմաններն են հարմար Ռուսաստանի հետ պատերազմն ավարտի շուրջ բանակցելու առումով։
«Ռուսաստանի հեռանալը Խերսոնից վկայում է ուկրաինական ուժերի անհավանական խիզախության մասին, բայց նաև հիշեցնում է, որ մենք պետք է շարունակենք օգնություն տրամադրել Ուկրաինային: Մենք չպետք է թույլ տանք Մոսկվայի ուժը թերագնահատելու սխալը: Ռուսաստանի Զինված ուժերն ունի նշանակալից կարողություններ և մեծ թվակազմ»,- ասել է Ստոլտենբերգը:
Միաժամանակ, ՌԴ ԱԳ փոխնախարար Ալեքսանդր Գրուշկոն ասել է, թե Ուկրաինայի հետ բանակցելու համար զորքն այդ երկրից դուրս բերելու նախապայմանն անընդունելի է: Մոսկվան ասում է, որ պատրաստ է բանակցել առանց նախապայմանների։
«Ինչպես նախագահ Վլադիմիր Պուտինն է բազմիցս նշել՝ Մոսկվան պատրաստ է բանակցել, սակայն հարկ է հաշվի առնել գետնի վրա ստեղծված իրողությունները»,- հայտարարել է Գրուշկոն:
«Հանուն Հանրապետության» կուսակցության փոխնախագահ Ռուբեն Մեհրաբյանից Factor TV-ի հարցազրույցում հետաքրքրվեցինք՝ պատերազմի այս ընթացքը ՌԴ-ին թույլ տալի՞ս է այսպիսի հայտարարություն անել։
«Իհարկե՝ ոչ։ Ես չհամաձայնվեցի այդ գնահատականների հետ, որովհետև Պուտինը ոչ թե թողել է Խերսոնի մարզը Ուկրաինային, այլ նա փախավ, չնահանջեց, և այդ փախուստը շարունակվում է արդեն Դնեպրի ձախ ափին։ Ուկրաինական բանակայիններն ուժեր են կուտակում այնտեղ՝ հարձակումը շարունակելու համար։ Ընդ որում, ուկրաինական հարձակումը շարունակվելու է դեպի Ղրիմ՝ Արմյանսկ կոչվող բնակավայրով, ինչը ես համարում եմ սիմվոլիկ։ Ես կարծում եմ, որ պատերազմն ունի դետերմինացված ելք, այն է՝ կանխորոշված։ Դա ՌԴ-ի հիմնահատակ ջախջախումն է։ Դա ոչ թե իմ ցանկությունն է, այլ ուժերի հարաբերակցությունն է այդպիսին։ Ես կարող եմ արդեն ասել, որ Պուտինի ատոմային շանտաժը չի գործել և արդեն իր կյանքին է վտանգ սպառնում»,- նշեց Ռուբեն Մեհրաբյանը։
Հարցազրույցն ամբողջությամբ՝ տեսանյութում։
Ռոբերտ Անանյան
