27.06.2026 | 21:49
Վուչիչը հայտարարել է նախագահի պաշտոնում իր «վերջին օրերի» մասին
Չինաստանը կոչ է արել բոլոր երկրներին հանգստություն պահպանել․ ինչ են հայտարարել արևմտյան երկրները Լեհաստանում ընկած հրթիռների կապակցությամբ
Քաղաքականություն
16.11.2022 | 21:11
Լեհաստանում հրթիռի ընկնելու պատճառով ուժեղացած լարվածության ֆոնին Չինաստանը հանդես է եկել հանգստություն պահպանելու կոչով, գրում է BBC-ի ռուսական ծառայությունը։
«Ներկա իրավիճակում բոլոր կողմերը պետք է հանգստություն պահպանեն և զսպվածություն ցուցաբերեն, որպեսզի կանխեն իրավիճակի սրումը»,- ճեպազրույցում լրագրողներին ասել է Չինաստանի ԱԳՆ խոսնակ Մաո Նինգը։
Ավելի վաղ ՄԱԿ-ի Անվտանգության խորհրդի անդամ մյուս երկրները ևս հանդես են եկել նմանատիպ կոչերով։
Մասնավորապես, Ֆրանսիան հորդորել է «չափազանց զգուշորեն» եզրակացություններ անել Լեհաստանում ընկած հրթիռի ծագման վերաբերյալ։
ԱՄՆ նախագահ Ջո Բայդենը քիչ հավանական է համարել, որ հրթիռն արձակվել է ռուսական զորքերի կողմից։ Լոնդոնը դեռ պաշտոնական հայտարարություններ չի արել, սակայն վարչապետ Ռիշի Սունակի աշխատակազմից հասկացրել են, որ նա համաձայն է Վաշինգտոնի հետ։
Լեհաստանում տեղի ունեցած ողբերգական միջադեպի վերաբերյալ իրենց դիրքորոշումն են հայտնել նաև որոշ այլ երկրներ։ Մասնավորապես, Էստոնիայի նախագահ Ալար Կարիսը BBC-ին ասել է, որ Տալլինում տեղի ունեցածը համարում են «եզակի դեպք», բայց, ամեն դեպքում, պատերազմը պետք է շուտափույթ դադարեցվի։
Ֆինլանդիայի արտաքին գործերի նախարար Պեկկա Հաավիստոն ընդգծել է, որ անհրաժեշտ է սկսել Լեհաստանին օգնել հետաքննության հարցում, պարզել միջադեպի բոլոր հնարավոր մանրամասները և միայն դրանից հետո «գործել համապատասխանաբար»։
Տաթև Ֆռանգյան
