31.10.2026 | 17:23
Երևանում բացվել է «ՀայՓաս»-ի երկրորդ գրասենյակը
Ռուսաստանի հրթիռային հարձակման ժամանակ Կիևում է եղել ԱՄՆ ԿՀՎ ղեկավարը․ Washington Post
Քաղաքականություն
16.11.2022 | 17:32
ԱՄՆ Կենտրոնական հետախուզական վարչության տնօրեն Ուիլիամ Բերնսը նախօրեին Կիևում հանդիպել է Ուկրաինայի նախագահ Վլադիմիր Զելենսկիի հետ, երբ մայրաքաղաքն ու երկրի այլ քաղաքներ ենթարկվում էին ռուսական զանգվածային հրթիռային հարձակման։ Այս մասին գրում է Washington Post-ը, որին վկայակոչում է BBC-ի ռուսական ծառայությունը։
Բերնսի այցը տեղի է ունեցել մի քանի օր այն բանից հետո, երբ ուկրաինական զորքերն ազատագրել են Խերսոնը։ Սա նաև արտակարգ լարված և որոշիչ պահի էր, քանի որ ռուսական արտադրության հրթիռն ընկել է Լեհաստանի տարածքի վրա՝ հարցեր առաջացնելով, թե ՆԱՏՕ-ն ինչպես կարող է արձագանքել անդամ երկրի վրա հնարավոր հարձակմանը:
Washington Post-ի աղբյուրը հայտնել է, որ ԿՀՎ ղեկավարն ապահով է եղել ԱՄՆ դեսպանատանը երեքշաբթի տեղի ունեցած հրթիռային հարձակումների ժամանակ:
Նշվում է, որ Կիևի և այլ քաղաքների ուղղությամբ հրթիռային հարվածները հաջորդեցին երկշաբաթյա լռությանը։ Լրատվամիջոցը նաև գրում է, որ ոչինչ չի մատնանշում, որ ռուսական հարձակումները պետք է համընկնեին Բերնսի այցի հետ։
Բերնսը նաև փորձառու դիվանագետ է, Ռուսաստանում ԱՄՆ նախկին դեսպանը, նա անցյալ նոյեմբերին մեկնել էր Մոսկվա և հանդիպել Կրեմլի բարձրաստիճան պաշտոնյաների հետ: Մոսկվայում գտնվելու ժամանակ նա հեռախոսով խոսել է նախագահ Վլադիմիր Պուտինի հետ և փոխանցել ԱՄՆ նախագահի ուղերձը՝ զգուշացնելով ՌԴ նախագահին, որ եթե նա ներխուժի Ուկրաինա, ապա ԱՄՆ-ը կերաշխավորի լուրջ հետևանքներ։
Ի դեպ, Կիև մեկնելուց առաջ Բերնսը Անկարայում բանակցություններ էր անցկացրել ՌԴ Արտաքին հետախուզական ծառայության ղելավար Սերգեյ Նարիշկինի հետ։
Էմմա Չոբանյան
