30.10.2026 | 21:37
Ալինա Չարաևան կիսաեզրափակիչ դուրս եկավ Իտալիայում
Ալբանիայի նախագահը Ալիևին հորդորել է ճանաչել Կոսովոյի անկախությունը
Քաղաքականություն
16.11.2022 | 23:09
Ադրբեջանի նախագահ Իլհամ Ալիևը նախօրեին մեկօրյա պաշտոնական այցով Ալբանիայում էր, որտեղ բանակցություններ է անցկացրել այդ երկրի նախագահի և վարչապետի հետ։ Ալբանիայի նախագահ Բայրամ Բեգան Ալիևի հետ համատեղ ճեպազրույցում հայտարարել է, որ Ադրբեջանի աջակցությանն են ապավինում Կոսվոյի ճանաչման հարցում, գրում են ադրբեջանական լրատվամիջոցները։
Նա նշել է, որ Կոսովոն շատ կարևոր է Ալբանիայի համար ոչ միայն կայունության, այլև «ամբողջ տարածաշրջանի առաջընթացի համար»։ Բեգան խնդրել է Ադրբեջանին ճանաչել Կոսովոն ու չարգելափակել նրա մուտքը միջազգային կազմակերպություններ, ինչպիսին է, օրինակ, Եվրոպայի խորհուրդը։
Ալբանիայի նախագահը հետաքրքրություն է հայտնել Ադրբեջանի հետ էներգետիկայի, ենթակառուցվածքների, զբոսաշրջության, գյուղատնտեսության և արդյունաբերության ոլորտներում համագործակցության ընդլայնման հարցում։ Նա նաև ընդգծել է, որ Ալբանիան միշտ աջակցել է Ադրբեջանի տարածքային ամբողջականությանը և ՄԱԿ-ի Անվտանգության խորհրդի բանաձևերի իրականացմանը։
Ալիևն իր հերթին նշել է Ալբանիայի տարանցիկ հնարավորությունները՝ մինչև 2027 թվականը ադրբեջանական գազի արտահանումը Եվրոպա կրկնապատկելու պլանների համատեքստում։ Միաժամանակ, նա մատնանշել է Ադրբեջանի հնարավորությունները հենց Ալբանիայի տարածքում գազի բաշխման ենթակառուցվածք ստեղծելու հարցում։
«Ալբանիայում գազային ցանց մինչ օրս չի ստեղծվել։ Ադրբեջանը պատրաստ է այդ հարցում մասնակցել որպես ներդրող»,- ասել է նա՝ նշելով նաև, որ Բաքուն սերտորեն համագործակցում է ՆԱՏՕ-ի հետ, որի անդամ է Ալբանիան։
Էմմա Չոբանյան
