27.06.2026 | 19:03
ԲՀԿ-ի համար ակնհայտ է՝ որևէ հաշվարկի դեպքում 4%-ի շեմը չի կարող համարվել հաղթահարված. Սուրեն Գրիգորյան․ ՏԵՍԱՆՅՈւԹ
G20-ի երկրները հայտարարությամբ դատապարտել են Ուկրաինայում Ռուսաստանի սանձազերծած պատերազմը
Քաղաքականություն
16.11.2022 | 16:27
G20-ի երկրներն ինդոնեզական Բալիում գագաթնաժողովի ժամանակ ընդունված համատեղ հայտարարության մեջ սուր քննադատության են ենթարկել Ռուսաստանի պատերազմն Ուկրաինայում, գրում է DW-ի ռուսական ծառայությունը։
«Անդամների մեծամասնությունը դատապարտել է ուկրաինական պատերազմը հնարավոր ամենախիստ ձևով և ընդգծել, որ այն անչափելի մարդկային տառապանք է պատճառում և խորացնում առկա խոցելիությունը համաշխարհային տնտեսության մեջ»,- ասվում է փաստաթղթում։
Նշվում է նաև, որ այս պատերազմը սահմանափակում է գլոբալ տնտեսական աճը, խթանում գնաճ, խախտում մատակարարումների շղթան, խորացնում էներգետիկ և պարենային անվտանգության բացակայությունն ու մեծացնում ֆինանսական կայության ռիսկերը։
Միաժամանակ, փաստաթղթում Ռուսաստանի մասով նշվում է, որ մասնակիցների թվում «տարբեր կարծիքներ և գնահատականներ են եղել իրավիճակի ու պատժամիջոցների առնչությամբ»։
«Մենք ընդունում ենք, որ G20-ը անվտանգության խնդիրներ լուծելու ֆորում չէ, բայց մենք գիտակցում ենք, որ անվտանգության խնդիրները կարող են էական ազդեցություն ունենալ համաշխարհային տնտեսության վրա»,- ասվում է հայտարարության մեջ։
Նշվում է, որ «միջուկային զենքի կիրառումը կամ կիրառման սպառնալիքն անընդունելի է»։ G20-ի երկրները պնդում են հակամարտությունների խաղաղ կարգավորման, ճգնաժամերի հաղթահարման ջանքերի, դիվանագիտության և երկխոսության անհրաժեշտության կարևորությունը։
Էմմա Չոբանյան
