30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Բլինքենը՝ Փաշինյանի հետ հեռախոսազրույցի մասին
Քաղաքականություն
16.11.2022 | 12:15
ԱՄՆ Պետքարտուղարությունը հաղորդագրություն է տարածել ՀՀ վարչապետ Նիկոլ Փաշինյանի հետ նախօրեին տեղի ունեցած հեռախոսազրույցի վերաբերյալ։
«Պետքարտուղարը ողջունել է Հայաստանի ու Ադրբեջանի ջանքերը աջակցելու երկկողմ խաղաղության քննարկումներին նոյեմբերի 7-ի բանակցություններից հետո։ Նա ընդգծել է՝ անհրաժեշտ է երկու կողմերը պահպանեն բանակցությունների թափը ու խուսափեն սադրանքներից։ Նա նաև կոչ է արել շարունակել առաջընթացը հասնել կոնկրետ արդյունքների՝ հաջակցություն խաղաղության գործընթացի»,- ասվում է հաղորդագրության մեջ։
Հեռախոսազրույցի վերաբերյալ Պետքարտուղարը նաև թվիթերում գրառում է արել․
«Ես հորդորել եմ վարչապետ Փաշինյանին նոյեմբերի 7-ին Վաշինգտոնում արտգործնախարարների բանակցություններից հետո պահպանել Ադրբեջանի և Հայաստանի միջև խաղաղ բանակցությունների ընթացքը։ Միացյալ Նահանգները հավատարիմ է մնում այդ ջանքերին»,- ասված է Բլինքենի գրառման մեջ։
Հիշեցնենք՝ ըստ հայկական կողմի տարածած հաղորդագրության՝ «Զրուցակիցները մտքեր են փոխանակել Հայաստանի ու Ադրբեջանի միջև հարաբերությունների կարգավորման, մասնավորապես, նոյեմբերի 7-ին Վաշինգտոնում տեղի ունեցած Հայաստանի ու Ադրբեջանի ԱԳ նախարարների և դրան հետևած եռակողմ հանդիպման վերաբերյալ: Պետքարտուղար Բլինքենը ԱՄՆ պատրաստակամությունն է հայտնել շարունակելու աջակցությունը Հայաստան-Ադրբեջան հարաբերությունների, ինչպես նաև Լեռնային Ղարաբաղի հիմնախնդրի կարգավորման հարցում: Վարչապետ Փաշինյանը բարձր է գնահատել ԱՄՆ ջանքերը և պետքարտուղար Բլինքենի անձնական ներգրավվածությունը: Զրուցակիցները պայմանավորվել են շարունակել քննարկումները տարածաշրջանում անվտանգության և կայունության մակարդակի բարձրացմանն ուղղված քայլերի, այդ թվում հումանիտար հարցերի կարգավորման վերաբերյալ»։
Էմմա Չոբանյան
