07.10.2026 | 23:00
Երթևեկության կազմակերպման փոփոխություն՝ Հակոբ Պարոնյան փողոցում
Ծնվեց մոլորակի 8 միլիարդերորդ բնակիչը․ երկրագնդին գերբնակեցում է սպառնում, Հայաստանին՝ դեմոգրաֆիկ ճգնաժամ․ ՏԵՍԱՆՅՈՒԹ
Քաղաքականություն
15.11.2022 | 17:20
Աշխարհի բնակչությունն այսօր հատեց 8 միլիարդի շեմը։ Դա տեղի ունեցավ 7 միլիարդի շեմն անցնելուց ընդամենը 11 տարի անց։ Դեռևս տարիներ առաջ ՄԱԿ-ի ազգաբնակչության հիմնադրամը հաշվարկել էր և նոյեմբերի 15-ը նշանակել 8 միլիարդի օր։
ՄԱԿ-ի գլխավոր քարտուղար Անտոնիո Գուտերեշն այս կարևոր իրադարձությունը նկարագրել էր որպես օր՝ «տոնելու մեր բազմազանությունը, ճանաչելու մեր ընդհանուր մարդասիրությունը և հիանալու առողջության առաջընթացով»՝ միաժամանակ հաշվի առնելով «մեր ընդհանուր պատասխանատվությունը՝ հոգ տանել մեր մոլորակի և միմյանց մասին»։
Այս պահի տվյալներով՝ աշխարհում ամենաշատ բնակչություն ունեցող երկրներն են Չինաստանն ու Հնդկաստանը, համապատասխանաբար, 1,4 և 1,45 միլիարդ բնակչությամբ: Ըստ կանխատեսումների՝ հաջորդ տարի Հնդկաստանի բնակչությունը կգերազանցի Չինաստանի բնակչության թվին:
8 միլիարդերորդ երեխայի խորհրդանշական ծնունդը Հայաստանում նշվել է Գեղարքունիքի մարզի Մարտունու ծննդատանը․ փոքրիկը 2800 գրամ քաշով Արփին է՝ Զաքարյանների ընտանիքի երրորդ երեխան։
Հայաստանում, սակայն, ի տարբերություն զարգացող երկրներից շատերի՝ ծնելիության ցուցանիշը շարունակում է նվազել: Վերջին տվյալներով՝ վերարտադրողականության գործակիցը կազմում է 1,6: Կանխատեսումներն այնպիսին են, որ մինչև 2050 թվականը այդ նվազման միտումը կպահպանվի: Պատճառը սոցիալ-տնտեսական է։
Այդուհանդերձ, ամբողջ աշխարհում ևս 20-րդ դարի կեսերին արձանագրված մեծ աճից հետո բնակչության աճի տեմպերը փոքր-ինչ դանդաղել են:
Մանրամասները՝ տեսանյութում։
Ռոզա Վարդանյան
