Քաղաքականություն
14.11.2022 | 21:57
Իտալիան, Հունաստանը, Մալթան և Կիպրոսը Բրյուսելին խնդրում են վերանայել միգրանտների ընդունման մեխանիզմը։ Խոսքը, մասնավորապես, այն երկրի վրա պատասխանատվություն դնելու մասին է, որի դրոշի ներքո նավը վարձակալված է (սովորաբար՝ հասարակական կազմակերպություն) անօրինական ներգաղթյալներին փրկելու համար, գրում է Euronews-ը:
Հռոմում, Աթենքում, Վալետայում և Նիկոսիայում կոչ են արել հրատապ և լուրջ քննարկել Միջերկրական ծովում փրկարարական գործողությունների համակարգումը։
Միգրանտների ընդունման հետ կապված խնդիրները հաճախ հանգեցնում են ԵՄ երկրների միջև առճակատումների։ Այսպես, օրինակ, Ֆրանսիայի և Իտալիայի միջև սկանդալ է ծագել Ocean Viking նավի շուրջ, որը վարձակալել է ֆրանսիական SOS Mediterranee հասարակական կազմակերպությունը։
Ocean Viking-ի անձնակազմը փրկել է ավելի քան 230 անօրինական ներգաղթյալի։ Երեք շաբաթ շարունակ նավը ծովում է եղել, մինչ երկու երկրները վիճում էին, թե ով է ընդունելու ապօրինի ներգաղթյալներին։ Փարիզը Հռոմին մեղադրել է անմարդկայնության մեջ՝ մոտակա (իտալական) նավահանգստում միգրանտներին ընդունելուց հրաժարվելու համար։ Իտալիայի վարչապետ Ջորջ Մելոնին «տարակուսանք է հայտնել Ֆրանսիայի ագրեսիվ արձագանքի կապակցությամբ»։
Արդյունքում միգրանտները ափ են դուրս եկել ֆրանսիական Տուլոնում։
Սպասվում է, որ նոյեմբերի վերջին տեղի կունենա ԵՄ անդամ 27 երկրների ներքին գործերի նախարարների գագաթնաժողովը, որտեղ կքննարկվի ներգաղթյալների տեղավորման և վերաբնակեցման հարցը։
Տաթև Ֆռանգյան
