Ստեփանակերտում կրքերը դեռ չեն հանդարտվել․ շարժումը շարունակվում է. ՏԵՍԱՆՅՈՒԹ

Երեկ երեկոյան Ստեփանակերտում ավարտվել է հունիսի 2-ին կենտրոնական՝ Ազատամարտիկների փողոցում մեկնարկած բողոքի ակցիան, որի ժամանակ շարժման համակարգող խորհրդի անդամները, անսալով ԱՀ նախագահ Բակո Սահակյանի և ՀՀ վարչապետ Նիկոլ Փաշինյանի հորդորին, դադարեցրին բողոքի ցույցը:

Հաշվի առնելով, որ Բակո Սահակյանին ժամանակ է պետք ուժային կառույցներում նոր նշանակումներ կատարելու համար, որոշում կայացվեց սպասել, բացել Ազատամարտիկների պողոտան և սպասել ԱՀ նախագահի քայլերին: Այսօր առավոտյան, սակայն, շարժման համակարգող խորհրդի անդամ Վարդան Ասծատրյանը իր մեքենայով եկել է ավտոկայան, որտեղ հավաքվում էին հանրահավաքի համար, նրա շուրջ ժողովուրդ է հավաքվել, ինչը խոչընդոտ է առաջացրել երթևեկության համար: Ոստիկանները նրան մայթ են ուղեկցել և պահանջել չխանգարել հասարակական կարգը:

ԱՀ ոստիկանության հասարակական կարգի ապահովման բաժնի պետ, ոստիկանության փոխգնդապետ Գագիկ Հարությունյանը, ով լիազորվել էր հավաքի կազմակերպիչների հետ հաղորդակցություն իրականացնելու համար, Վարդան Ասծատրյանին հորդորել է կատարել օրենքի պահանջները: Արդյունքում վերջինս հեռացել է, հավաքված քաղացացիների մի մասը՝ ևս , իսկ մյուս մասը շարժման համակարգողներից Դավիթ Սիմոնյանի ուղեկցությամբ դրոշներով շարժվել է դեպի Վերածննդի հրապարակ, որտեղ նրանց գրասենյակ է տրամադրվել Հանրային խորհուրդ ստեղծելու համար:

Խորհրդի անդամ է ընտրվել նաև Սիմոնյանը:  Factor.am-ի հետ հետ զրույցում Դավիթ Սիմոնյանը որոշ մանրամասներ է ներկայացրել առաջիկա քայլերի մասին: «Մենք արդարության համար ենք այստեղ: Մենք գնում ենք մեզ հատկացված գրասենյակ` լսելու համար ժողովրդի սոցիալական խնդիրները: Նրանց ներկայացված բոլոր դիմումները, բողոքները ներկայացնելու ենք համապատասխան մարմիններին»,- նշել է Սիմոնյանը։