27.02.2026 | 10:27
Հայաստանն առաջին մեդալն է ապահովել Ստրանջայի մրցաշարում
Ժնևում մեկնարկել են հացահատիկային գործարքի շուրջ ՌԴ-ի և ՄԱԿ-ի բանակցությունները
Քաղաքականություն
11.11.2022 | 14:56
ՌԴ-ի և ՄԱԿ-ի միջև հացահատիկային գործարքի շուրջ բանակցությունների նոր փուլն է մեկնարկել։ Այս մասին հայտնել է ՄԱԿ-ի Ժնևի գրասենյակի ղեկավար Ալեսսանդրա Վելուչին, գրում է ՌԻԱ Նովոստին։
«Հանդիպումը մեկնարկել է»,- ասել է նա ճեպազրույցում։
Ռուսական պատվիրակությունը ղեկավարում է ՌԴ ԱԳ փոխնախարար Սերգեյ Վերիշինը։ ՄԱԿ-ի կողմից բանակցություններին մասնակցում են Առևտրի և զարգացման կոնֆերենցիայի գլխավոր քարտուղար Ռեբեկա Գրինսպենը և կառույցի հումանիտար հարցերի համակարգման վարչության ղեկավար Մարտին Գրիֆիթսը։
Ավելի վաղ ՄԱԿ-ի ներկայացուցիչ Ստեֆանի Թրեմբլեյը հայտնել էր, որ հանդիպմանը «շարունակվելու են խորհրդակցությունները՝ աջակցելու գլխավոր քարտուղարի (ՄԱԿ) ջանքերին՝ պայմանավորվածությունների իրականացման ուղղությամբ»։
Հավելենք, որ հացահատիկային գործարքի ժամկետը լրանում է նոյեմբերի 19-ին։ Թուրքիայի ՊՆ ղեկավար Հուլուսի Աքարն ավելի վաղ առաջարկել էր կողմերին այն երկարաձգել մեկ տարով։ Գործարքը կնքվել էր հուլիսի 22-ին Ստամբուլում՝ Թուրքիայի, ՌԴ-ի, Ուկրաինայի և ՄԱԿ-ի միջև։
Հոկտեմբերի 29-ին ՌԴ-ն հայտարարել էր, որ դուրս է գալիս հացահատիկային գործարքից՝ Ուկրաինայի կողմից Սևաստոպոլի նավատորմի վրա հարձակումների պատճառով։ Սակայն նոյեմբերի 2-ին Թուրքիայի նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինի հետ բանակցություններից հետո հայտարարել էր, որ Մոսկվան վերադառնում է գործարքին։
Էմմա Չոբանյան
