Վահան Խալաֆյանի գործի քննությունը միակողմանի է կատարվել. Արա Ղազարյան․ ՏԵՍԱՆՅՈՒԹ

«ՄԻԵԴ-ն անդրադարձել է ամենակարևոր խնդրին՝ այն է՝ Վահան Խալաֆյանի գործի քննությունը ի սկզբանե իրականացվել է միակողմանի»,- այս մասին «Ոստիկանության բաժանմունքում մահացած Խալաֆյանի գործով ՄԻԵԴ վճռի ազդեցությունը համակարգի վրա» թեմայով քննարկման ժամանակ նշեց ՄԻԵԴ-ում Վահան Խալաֆյանի ազգականների շահերի ներկայացուցիչ, փաստաբան Արա Ղազարյանը։

Փաստաբանի խոսքով՝ դատաքննության ընթացում բոլորովին հաշվի չի առնվել պաշտպանական կողմի հիմնավոր փաստաթղթերն առ այն, որ տեղի է ունեցել ոչ թե ինքնասպանություն, այլ սպանություն՝ բռնության՝ գլխին ստացած հարվածի հետևանքով, և քննությունն իրականացվել է միակողմանի և միջազգային իրավունքի բազմաթիվ խախտումներով։

«Շատ կարևոր է, որ ՄԻԵԴ-ի վճռից հետո երկրորդ քայլը լինի՝ գործի վերաբացման վարույթ հարուցվի»,- նշեց Ղազարյան»։

Նշենք, որ Չարենցավանի ոստիկանության բաժնում 2010-ին մահացած Վահան Խալաֆյանի գործով ՄԻԵԴ-ը վճիռ է կայացրել Հայաստանի դեմ. հաստատվել է, որ Հայաստանի իշխանությունները չեն պաշտպանել ոստիկանության բաժին անօրինական բերման ենթարկված Խալաֆյանին, խախտվել են կյանքի և խոշտանգումների արգելքի իրավունքները, իսկ «հենց քննության առաջին օրը առանց հիմնավորման ընդունվել է ոստիկանության բաժնում ինքնասպանության վարկածը», որը հետագայում կասկածի տակ չի առնվել»։

ՄԻԵԴ-ը նկատել է, որ Խալաֆյանի մահվան վարկածն ամբողջովին կառուցվել է ոստիկանության 2 ծառայողների պատմածի հիման վրա, թեև նույն ոստիկանները ներգրավված են եղել միջադեպին և, ըստ դատարանի, «չեն կարող համարվել անաչառ վկաներ»։

ՄԻԵԴ-ն արձանագրել է, որ 12 տարի առաջ Չարենցավանի ոստիկանական բաժանմունքում խախտվել են 24-ամյա Վահան Խալաֆյանի կյանքի և խոշտանգումներից զերծ մնալու իրավունքները։ Ստրասբուրգյան դատարանը ՀՀ-ին պարտավորեցրել է եռամսյա ժամկետում 50 հազար եվրո վճարել Խալաֆյաններին՝ որպես ոչ նյութական վնասի հատուցում:

Մանրամասները՝ տեսանյութում։