Պաշտոնական Բաքվի նյարդային արձագանքը Նիկոլ Փաշինյանի ելույթին

Ադրբեջանի ԱԳՆ-ն արձագանքել է ՀՀ վարչապետ Նիկոլ Փաշինյանի նախօրեի ելույթին։ Ադրբեջանական լրատվականների հաղորդմամբ՝ ԱԳՆ նոր խոսնակ Այխան Հաջիզադեն հայտարարել է, թե Հայաստանի վարչապետն, իբր, խեղաթյուրում է օկուպացված Շուշիից հնչեցված Ադրբեջանի նախագահ Իլհամ Ալիևի հայտարարությունները։ Նա դժգոհել է, թե «Փաշինյանն իր հայտարարություններով տպավորություն է ստեղծում, որ Ադրբեջանը չի կատարում իր պարտավորությունները»։

«Հայաստանի ղեկավարության նման մոտեցումը հանդիսանում է ևս մեկ հարված  երկու երկրների միջև հարաբերությունների կարգավորման ու տարածաշրջանում խաղաղության հաստատման գործընթացին»,-ասել է  Հաջիզադեն՝ պնդելով, թե Հայաստանն,իբր, հրաժարվում է կատարել 2020 թ-ի նոյեմբերի 9-ի եռակողմ հայտարարության կետերը:

«Հենց հայկական կողմն է ձգձգում  Ադրբեջանի արևմտյան շրջանների ու Նախիջևանի միջև կապի բացումը՝ այդպիսով խախտելով եռակողմ հայտարարության 9-րդ կետով ստանձնած պարտավորությունը։ Ինչ վերաբերվում է «Զանգեզուրի միջանցքին», ապա այստեղ խոսքը Ադրբեջանի և Նախիջևանի միջև պատմական կապերի վերականգնման մասին է, և դա իր հերթին ենթադրում է այդ միջանցքի օգտագործումը խաղաղ և մարդասիրական նպատակներով»,-ասել է Հաջիզադեն։

ԱԳՆ խոսնակը Փաշինյանի հայտարարություններն այն մասին, որ Ադրբեջանը մտադիր է փակել Լաչինի միջանցքը, գնահատել է «տարածաշրջանում իրավիճակի միտումնավոր սրման փորձ»։ Ստացվում է՝ Ադրբեջանի ԱԳՆ նոր խոսնակը կամ  տեղյակ չէ Իլհամ Ալիևի՝ Շուշիում հնչեցրած վերջին  հայտարարություններից, որոնցում սպառնում էր փակել Լաչինի միջանցքը, կամ  միտումնավո խեղաթյուրում է դրանք։

Էմմա Չոբանյան