Քաղաքականություն
11.11.2022 | 16:55
Թեհրանում Ադրբեջանի դեսպան Ալի Ալիզադեն երեկ երեկոյան կանչվել է Իրանի ԱԳՆ՝ ադրբեջանական ԶԼՄ-ների և պաշտոնյաների կողմից շարունակվող հակաիրանական քարոզչության և զրպարտության համար, հայտնում է IRNA գործակալությունը։
Նշվում է, որ նախարարի օգնականը և ԱԳ նախարարության Եվրասիայի հարցերով գլխավոր տնօրենն Ադրբեջանի դեսպանին են փոխանցել Իրանի Իսլամական Հանրապետության դժգոհությունն ու խիստ բողոքը՝ կապված Ադրբեջանի բարձրաստիճան պաշտոնյաների ոչ բարեկամական հայտարարությունների և այդ երկրի մեդիայում Թեհրանի կերպարի սևացման կապակցությամբ։
«Մենք ակնկալում ենք, որ այս գործընթացը կավարտվի որքան հնարավոր է շուտ և անհրաժեշտ միջոցներ կձեռնարկվեն՝ կանխելու դրա կրկնությունը»,- ասել է Իրանի ԱԳՆ պաշտոնյան։
Ըստ լրատվամիջոցի՝ Ադրբեջանի դեսպանն ափսոսանք է հայտնել ու նշել, որ բողոքն անմիջապես կփոխանցի Բաքու։
Թեհրանին նմանատիպ քայլով է պատասխանել Բաքուն։ Այսօր Ադրբեջանում Իրանի դեսպան Աբբաս Մուսավին կանչվել է երկրի ԱԳՆ՝ նույնական մեղադրանքներով։
Ադրբեջանական ԶԼՄ-ների փոխանցմամբ՝ հանդիպմանը դեսպանին մտահոգություն են հայտնել, որ իրանական ԶԼՄ-ներում Ադրբեջանի դեմ քարոզչական արշավ է ընթանում, զրպարտչական արշավ՝ Իրանի բարձրաստիճան քաղաքական ու ռազմական ղեկավարության սպառնալից հռետորաբանությամբ։ Ասվել է, որ դեսպանատներում Ադրբեջանի Հանրապետությունում անջատողականություն հրահրող և քրեական հետապնդումից խուսափող, այլ երկրներում թաքնվող անձանց ընդունելությունը ոչ բարեկամական քայլ է։ Բաքուն ընդգծել է նաև, որ Իրանում Ադրբեջանի դեմ նման տեղեկատվության և գործողությունների տարածումն անընդունելի է, և ակնկալվում է, որ դրանք հնարավորինս շուտ կդադարեցվեն։
Էմմա Չոբանյան
