17.12.2025 | 19:29
«Սևան ստարտափ սամմիթ»-ի հիմնադիրը ՀՀ նախագահին է ներկայացրել նոր սմարթ քաղաքի կառուցման հայեցակարգի վերաբերյալ իր տեսլականը
ՌԴ-ում Հայաստանի դեսպանատունը սադրանք է որակել Մոսկվայում Շուշիի օկուպացիայի մասին Ալիևի դստեր ֆիլմի ցուցադրումը
Քաղաքականություն
10.11.2022 | 20:13
ՌԴ-ում Հայաստանի դեսպանատունը ֆեյսբուքյան էջում անդրադարձել է Մոսկվայում Ադրբեջանի կողմից Շուշիի օկուպացիայի մասին պատմող ֆիլմի ցուցադրությանը։
«Ռուսաստանի Դաշնությունում Հայաստանի Հանրապետության դեսպանությունն իր խորը հիասթափությունն է հայտնում 2022 թվականի նոյեմբերի 9-ին Համառուսաստանյան ցուցահանդեսային կենտրոնի (ВДНХ) տարածքում ցուցադրության կապակցությամբ, որը նկարահանվել է ադրբեջանցի կինոպրոդյուսեր Արզու Ալիևայի կողմից 2020 թվականի աշնանը Լեռնային Ղարաբաղի (Արցախի) խաղաղ բնակչության դեմ ագրեսիայի մասին, որը հետագայում անվանվեց 44-օրյա պատերազմ։ Տվյալ գործողությունը դիտարկում ենք որպես բացահայտ սադրանք՝ ուղղված ազգամիջյան ատելություն հրահրելուն և խաթարելու վերջին տարիներին կատարված բազմաթիվ ջանքերը՝ կանխելու լարվածության հետագա սրումը, ինչպես Հայաստանի և Ադրբեջանի, այնպես էլ Ռուսաստանի տարածքում երկու երկրների համայնքների միջև»,- ասվում է հայտարարության մեջ։
Նշվում է, որ օդիոզ վերնագրով՝ «Շուշի՛, դու ազատ ես» ֆիլմը հերթական արգասիքն է ադրբեջանական հայատյաց քարոզչության, որը ոչ միայն վիրավորում է ՌԴ տարածքում ապրող հայ համայնքի, այնպես էլ Հայաստանի և Արցախի հայերի զգացմունքները։
«Ակնհայտ է, որ նման գործողություններով ադրբեջանական կողմը փորձում է միջազգային հանրության աչքում արդարացնել Լեռնային Ղարաբաղի խաղաղ բնակչության և նրանց պաշտպանների դեմ կատարված ծանրագույն ռազմական հանցագործությունները՝ ինչպես 2020 թվականի պատերազմի, այնպես էլ 2021-2022 թվականների իրադարձությունների ժամանակ»,- մասնավորապես ասվում է հայտարարության մեջ։
Հավելենք, որ ֆիլմը ներկայացվել է նոյեմբերի 9-ին փակ ցուցադրությամբ։ Այն Բաքվի Մեդիա Կենտրոնի և «Salnaməfilm» ստուդիայի համատեղ աշխատանքն է։ Գլխավոր պրոդյուսերի դերում հանդես է եկել Արզու Ալիևան, որը Բաքվի Մեդիա Կենտրոնի ղեկավարն է ու Ադրբեջանի նախագահ Իլհամ Ալիևի դուստրը։
Էմմա Չոբանյան
