Ասել՝ Փաշինյանը միջանցք է խոստացել, նշանակում է՝ ադրբեջանցի ես կամ Ալիևի լոբբիստ ՀՀ-ում․ Էդմոն Մարուքյան. ՏԵՍԱՆՅՈՒԹ

Ադրբեջանի նախագահ Իլհամ Ալիևը մեղադրում է ՀՀ-ին՝ Բաքվին Նախիջևանի հետ ճանապարհային կապ չտալու մեջ՝ Լաչինի միջանցքի հետ տրվելիք ճանապարհը նույնացնելով։ Մեկնաբանելով Ալիևի խոսքերը՝ Հայաստանի ընդդիմության առաջնորդ Իշխան Սաղաթելյանը հայտարարեց, որ Ալիևը կարող էր նկատի ունենալ բանավոր համաձայնությունները․ «Ակնհայտ է, որ նոյեմբերի 9-ի փաստաթղթով միջանցք չկա, բայց կարծես թե արդեն ակնհայտ է, որ կա բանավոր պայմանավորվածություն: Իմ մոտ տպավորություն է, որ այո՛, կարծես թե այն ժամանակ Նիկոլը դրա բանավոր խոստումը տվել է, և հիմա դա են ուզում: Եթե փաստաթղթին են հղում անում, այդ փաստաթղթում միջանցք չկա, բայց անընդհատ ասում են՝ «մենք ունենք պայմանավորվածություն»»:

Factor TV-ին տված հարցազրույցում Հատուկ հանձնարարություններով դեսպան, ԼՀԿ նախագահ Էդմոն Մարուքյանին հարց ուղղեցինք՝ գուցե Ալիևին Նիկոլ Փաշինյանն իսկապե՞ս նման խոստում է տվել և իրեն էլ չի ասել այդ մասին։ Արդյո՞ք վստահ է, որ չկա նման բան։

«Նման նարատիվներով խոսույթ, նարատիվ վարել, դրա համար առնվազն կա՛մ պետք է ադրբեջանցի լինես, կա՛մ Ադրբեջանի լոբբիստը լինես Հայաստանում, ընդ որում՝ բավականին մեծ ռեսուրսներով լոբբինգ իրականացնես։ Այդ նարատիվը, որ նշեցիք, Ադրբեջանի նարատիվն է, դա Ադրբեջանն է լոբբինգ անում՝ ադրբեջանական փորձագետները, Իլհամ Ալիևի գլխավորությամբ տարածում է այդ նարատիվները, նաև կան ռուս գործիչներ, որ դա ասում են, ում մուտքը ՀՀ արգելված է»,- ասաց Էդմոն Մարուքյանը։

Նրա խոսքով՝ այնպիսի ֆունդամենտալ հարցի շուրջ, ինչպիսին ապաշրջափակումն է, չի կարող բանավոր պայմանավորվածություն լինել։

«Բանավոր գիտե՞ք՝ ինչ կարող է լինել, որ հանդիպում լինի, ասենք՝ պետք է ռազմագերիներին վերադարձրեք, ասի՝ դե լավ, որպես բարի կամքի դրսևորում, չորեքշաբթի երկու հոգու կվերադարձնեմ։ Դա կարող է լինել, բայց իրենց նշած միջանցքի կամ մեր ասած ճանապարհի վերաբերյալ բանավոր պայմանավորվածության մասին խոսակցության վարումը ՀՀ-ում, կրկնում եմ՝ կա՛մ այդ մադրիկ պետք է լինեն ադրբեջանցի, որ անեն, կա՛մ Ադրբեջանի լոբբիստ։ Քանի որ ադրբեջանցի չեն, հայեր են, ուրեմն՝ նրանք հայեր են, ովքեր լոբբինգ են անում Ադրբեջանի պետական պաշտոնական շահերն անկախ ՀՀ-ի սուվերեն տարածքում։ Ընդ որում՝ նրանք զբաղեցնում են բարձր պաշտոններ այդ լոբբինգն իրականացնելիս»,- ասաց Հատուկ հանձնարարություններով դեսպան Էդմոն Մարուքյանը։

Հարցազրույցն ամբողջությամբ՝ տեսանյութում։

Ռոբերտ Անանյան