Օտարերկրյա ընկերությունների հեռանալը ՌԴ-ից սպառնում է տնտեսական կորուստներով․ Սբերբանկի ղեկավար

Օտարերկրյա ընկերությունների զանգվածային դուրսբերումը ռուսական շուկայից՝ Ուկրաինա Ռուսաստանի ռազմական ներխուժման լույսի ներքո, երկարաժամկետ հեռանկարում վնաս է հասցնում երկրի տնտեսությանը։ Այս մասին Մոսկվայում «Ֆինոպոլիս» ֆորումի ժամանակ ասել է Սբերբանկի խորհրդի նախագահ Գերման Գրեֆը, գրում է DW-ի ռուսական ծառայությունը։

«Ես լավ չեմ գնահատում օտարերկրյա վաճառողների՝ շուկայից դուրս գալը։ Ռուսական ոչ մի ընկերություն չի կարողանա պահպանել մրցակցության այն մակարդակը, որը կար»,- Գրեֆի խոսքերն է մեջբերում РБК-ն։

«Որոշ ակտիվների միանվագ ստացումը, և համեմատաբար էժան, դա մեկանգամյա շահույթ է ինչ-որ մեկի համար, բայց տնտեսությունը երկարաժամկետ կտրվածքով կկորցնի, քանի որ մրցակցության խտությունը կնվազի։ Որտեղ չկա մրցակցություն, չկա նորարարություն»,- պարզաբանել է «Սբերբանկի» խորհրդի նախագահը։

Միաժամանակ, ՎՏԲ-ի խորհրդի նախագահ Անդրեյ Կոստինը նշել է, որ Ռուսաստանի Դաշնությունից արտասահմանյան ընկերությունների արտահոսքը թույլ է տալիս խնայողություններ անել։

«Միգուցե խոշոր ընկերությունների հեռանալու մեջ լավ բան չկա, բայց, ի դեպ, սա մեզ տալիս է ոչ միայն քաղաքական կամ բիզնես պաշտպանվածություն, այլ նաև ծախսերի խնայողություն»,- ասել է նա։

ՎՏԲ-ի ղեկավարի խոսքով՝ նրա կառույցները երեք տարվա ընթացքում կկարողանան խնայել մոտ 500 միլիարդ ռուբլի, քանի որ նրանք մասնակիորեն փոխարինել են արտասահմանյան ՏՏ արտադրանքը սեփականով։

Ըստ Յեյլի կառավարման դպրոցի՝ նոյեմբերի սկզբին տնտեսության բազմաթիվ ոլորտներից ավելի քան հազար օտարերկրյա ընկերություններ լքել են Ռուսաստանը, կրճատել կամ դադարեցրել իրենց բիզնեսը երկրում:

Իր հերթին, մի շարք ռուսական ընկերություններ ստիպված են եղել լքել արտաքին շուկաները կամ սահմանափակել իրենց ներկայությունը դրանցում։ Այսպիսով, ապրիլին ՎՏԲ-ն կորցրել է վերահսկողությունը Մայնի Ֆրանկֆուրտում գտնվող VTB Bank Europe SE-ի եվրոպական դուստր ձեռնարկության նկատմամբ։ Սբերբանկը մարտին հայտարարել է եվրոպական շուկայից դուրս գալու մասին։

Տաթև Ֆռանգյան