09.10.2026 | 21:27
ՀՀ-ն զգալի առաջընթաց է արձանագրել վիզաների ազատականացման ոլորտում․ ԵՄ գնահատման 2-րդ առաքելությունը ՀՀ-ում է
Amnesty International-ը ՌԴ-ին մեղադրել է Ուկրաինայում մարդկության դեմ հանցագործություններ իրականացնելու համար
Քաղաքականություն
10.11.2022 | 18:23
Amnesty International միջազգային իրավապաշտպան կազմակերպությունը զեկույց է հրապարակել ՌԴ զորքերի կողմից Ուկրաինայի օկուպացված տարածքներից խաղաղ բնակիչների բռնի տեղահանման և արտաքսման մասին, գրում է Meduza-ն։
Զեկույցը կոչվում է «Փուլ առ փուլ․ Ռուսաստանի անօրինական տեղափոխումները քաղաքացիական անձանց Ուկրաինա և չարաշահումները «ֆիլտրման» գործընթացում»։ Զեկույցում նշվում է, որ ռուսական և ՌԴ-ի վերահսկողության տակ գտնվող ուժերը բռնի կերպով տեղափոխել են Ուկրաինայի բնակիչներին օկուպացված տարածքներից շրջաններ, որոնք վերահսկում են ՌԴ ԶՈւ-ն, կամ էլ Ռուսաստան։
«Այս տեղահանման ընթացքում երեխաները բաժանվել են իրենց ընտանիքներից, որը խախտում է միջազգային մարդասիրական իրավունքը»,- ասվում է զեկույցում։
Այն պատրաստելիս Amnesty International-ը հարցազրույց է անցկացրել 88 մարդու, այդ թվում՝ Մարիուպոլի 48 բնակիչների հետ։ Հարցված ուկրաինացիներն ասել են, որ ռուսական ուժերը «զտել են» բռնի տեղահանված մարդկանց։ Ոմանք, ասվում է զեկույցում, կամայականորեն կալանավորվել են, ծեծի են ենթարկվել, խոշտանգվել էլեկտրաշոկով և մահապատժի սպառնալիքի ենթարկվել: Մյուսներին մերժել են սնունդ ու ջուր տրամադրել, իսկ շատերը պահվել են վտանգավոր պայմաններում և գերբնակեցված խցերում։
«Ռուսաստանի դատապարտելի գործողությունները՝ մարդկանց բռնի տեղահանումը և արտաքսումը, ռազմական հանցագործություն են։ Amnesty International-ը կարծում է, որ դրանք պետք է որակվեն և հետաքննվեն որպես մարդկության դեմ ուղղված հանցագործություն»,- ասել է կազմակերպության գլխավոր քարտուղար Անես Կալլամարը։
Էմմա Չոբանյան
