16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Ուկրաինայի հարցով բանակցություններին ՌԴ-ի պատրաստակամությունը տեսանելի չէ․ ԱՄՆ Պետքարտուղարություն
Քաղաքականություն
09.11.2022 | 14:51
ԱՄՆ-ը չի հավատում, որ Ռուսաստանը տրամադրված է Ուկրաինայի հարցով խաղաղ բանակցությունների։ Վաշինգտոնում կայացած ճեպազրույցում ասել է Պետքարտուղարության խոսնակ Նեդ Փրայսը։
«Մենք չենք տեսել որևէ բան, որը ցույց տա, որ ռուսներն այս պահին կցանկանան բանակցություններ վարել բարի կամքի հիման վրա»,- ասել է նա։
Փրայսի խոսքով՝ ռուսները կարող էին ցույց տալ իրենց ցանկությունն ու պատրաստակամությունը երկխոսության և դիվանագիտության համար մի շարք ձևերով. «Առաջին հերթին՝ դադարելով ռմբակոծել քաղաքացիական թիրախները, դադարեցնել թիրախավորել ենթակառուցվածքները, ջեռուցման, ջրամատակարարման, էլեկտրաէներգիայի համակարգերը Ուկրաինայի ժողովրդի համար: Մյուս քայլը պետք է լինի դադարեցնել այն, ինչ բնակելի թաղամասերի, քաղաքացիական շենքերի, խաղահրապարակների, դպրոցների, հիվանդանոցների լավագույն դեպքում՝ ոչ ընտրողական գնդակոծությունն է, իսկ վատագույն դեպքում՝ այդ վայրերի դիտավորյալ գնդակոծությունները»։
Մեկնաբանելով Ռուսաստանի հայտարարությունը հացահատիկային գործարքից դուրս գալու, այնուհետև՝ դրան վերադառնալու մասին՝ Նեդ Փրայսը նշել է, որ Մոսկվան կարող է ցույց տալ իր հավատարմությունը երկխոսությանը և դիվանագիտությանը՝ հրաժարվելով նման «անօգուտ» քայլերից։ Ըստ ամերիկացի պաշտոնյայի՝ Ռուսաստանը փորձում է Սևծովյան նախաձեռնությունը դարձնել իր ազդեցության լծակը։
Տաթև Ֆռանգյան
