06.05.2024 | 12:45
Ինչ ասել եմ, ճիշտ եմ ասել. Սիմոնյանը՝ Մոսկվայի վերաբերյալ արած հայտարարության մասին․ ՏԵՍԱՆՅՈՒԹ
ԵՄ-ն և Ղազախստանը համաձայնագիր են ստորագրել էներգակիրների մատակարարման վերաբերյալ
Քաղաքականություն
08.11.2022 | 13:19
Եվրամիությունը և Ղազախստանն ընդլայնում են համատեղ աշխատանքը էներգիայի և հումքի մատակարարման ոլորտներում։ Համապատասխան համաձայնագիրը ստորագրել են Եվրահանձնաժողովի ղեկավար Ուրսուլա ֆոն դեր Լեյենը և Ղազախստանի վարչապետ Ալիխան Սմաիլովը երկուշաբթի օրը՝ նոյեմբերի 7-ին, ՄԱԿ-ի Կլիմայի փոփոխության 27-րդ համաժողովի շրջանակներում, հայտնում է Եվրահանձնաժողովի մամուլի ծառայությունը։
Նշվում է, որ այս համաձայնագրի նպատակն է ապահովել որոշակի տեսակի հումքի մատակարարում և զարգացնել արտադրական շղթաները ջրածնի և մարտկոցների արտադրության համար՝ առանց շրջակա միջավայրին վնաս պատճառելու։
Ակնկալվում է, որ Ղազախստանի հետ ԵՄ-ի համատեղ նախագծերը, օրինակ, հանքարդյունաբերության և նավթի վերամշակման գործընթացների ոլորտում, կմշակվեն առաջիկա վեց ամիսների ընթացքում։ Իր հերթին Գերմանիան նույնպես ցանկություն է հայտնել սերտացնել իր համագործակցությունը Ղազախստանի հետ։
ԵՄ-ի կախվածությունը մատակարարման շղթաներից, մասնավորապես՝ Չինաստանից, հատկապես տեսանելի է դարձել կորոնավիրուսային համաճարակի ժամանակ։ Միևնույն ժամանակ, Ռուսաստանի Դաշնության պատերազմն Ուկրաինայի դեմ ցույց տվեց ԵՄ շատ երկրների մեծ կախվածությունը ռուսական էներգակիրներից։ Այսօր Եվրամիությունը փորձում է նոր տնտեսական գործընկերներ գտնել։
Ինչպես ասել է ֆոն դեր Լեյենը RTL-ին և ntv-ին տված հարցազրույցում՝ նա մտադիր է նաև համաձայնագրեր ստորագրել «կանաչ» ջրածնի արտադրության վերաբերյալ Նամիբիայի և Եգիպտոսի հետ՝ Շարմ էլ-Շեյխում կայացած կլիմայական կոնֆերանսի շրջանակներում։
Ավելի վաղ Եվրահանձնաժողովը հայտնել էր, որ գործընկերային նախագծեր են քննարկում այնպիսի երկրների հետ, ինչպիսիք են Սենեգալը, Վիետնամը, Հնդկաստանը և Ինդոնեզիան։
Տաթև Ֆռանգյան
