15.01.2025 | 14:02
36-ամյա տղամարդը դանակով հարվածել է հարևանին
Թուրքիայում փաստաբանի են ձերբակալել՝ թուրքական բանակի կողմից քիմիական զենքի կիրառման պնդումների համար
Քաղաքականություն
04.11.2022 | 23:23
Թուրքիայում ոստիկանությունը նախօրեին ձերբակալել է արևմտյան Իզմիր նահանգում աշխատող փաստաբան Արյեն Թուրանին, որը կոչ է արել հետաքննել թուրքական Զինված ուժերի կողմից քիմիական զենքի օգտագործումը ընդդեմ Քուրդիստանի աշխատավորական կուսակցության (PKK) զինյալների, գրում է Duvar-ը։
Նա, մասնավորապես, հոկտեմբերի 22-ին կոչ է արել հետաքննել խնդրո առարկա մեղադրանքները Իզմիրի փաստաբանների միության ընտրությունների ժամանակ: Թուրանն իր ելույթն ավարտել է «Ջին, Ջիյան, Ազադի» կարգախոսով, որը քրդերենից թարգմանաբար նշանակում է «Կանայք, կյանք, ազատություն»։ Թուրանն այդ ժամանակ անմիջապես թիրախավորվել է իսլամամետ և կառավարամետ թերթերի կողմից։
Հիշեցնենք, որ օրերս էլ ձերբակալվել էր Թուրքական բժշկական ասոցիացիայի և Թուրքիայի Մարդու իրավունքների հիմնադրամի նախագահ Շեբնեմ Ֆինջանջին՝ դարձյալ հետաքննություն պահանջելու հայտարարության համար։
Հավելենք, որ PKK-ին մոտ կանգնած լրատվամիջոցները հրապարակել էին տեսանյութեր, որոնք ցույց են տալիս, թե ինչպես է թուրքական բանակը քիմիական զենք օգտագործում Հյուսիսային Իրաքում PKK-ի դեմ։ Թուրքիայի մի շարք պաշտոնյաներ հերքել են այս մեղադրանքները, այդ թվում՝ նախագահ Ռեջեփ Թայիփ Էրդողանը։
Էմմա Չոբանյան
