Սարսափով եմ արձանագրում, որ շատ նպաստ ստացողներ վատնում են իրենց փողերը խաղադրույքների վրա. Փաշինյան․ ՏԵՍԱՆՅՈՒԹ

Խաղադրույք կատարելը Հայաստանում վեր էր ածվել տնտեսության առաջատար ճյուղի: Այս մասին ԱԺ հանձնաժողովների համատեղ նիստում 2023 թվականի բյուջեի քննարկումների ժամանակ հայտարարեց ՀՀ վարչապետ Նիկոլ Փաշինյանը:

Անդրադառնալով խաղադրույքների կամ շահումով խաղերի գովազդների ոլորտում կառավարության վարած քաղաքականությանը, Փաշինյանը նշեց. «Սա կարևոր սոցիալական նշանակություն ունի: Երբեմն մենք խորությամբ չենք գիտակցում ճգնաժամի մասշտաբներն ու չափը: Ես հիշում եմ, 2018-ին, երբ նոր էի ստանձնել վարչապետի պաշտոնը, հունիս-հուլիսին գրանցվեցին 9,5 և 10,8 տնտեսական ակտիվության ցուցնաիշներ: Ինձ հետաքրքիր էր, թե ինչի հաշվին է դա արձանագրվել: Ես սարսափով արձանագրեցի, որ դրա մի հսկայական մասը կապված է ֆուտբոլի աշխարհի առաջնության հետ: Պարզվեց՝ մեր երկրպագուները շատ մեծ տեմպերով խաղադրույքներ  են կատարում: Բոլորի իրավունքն ու ազատությունն է, բայց խաղադրույք կատարելը ՀՀ-ում վեր էր ածվել տնտեսության առաջատար ճյուղի: Սրանով ամեն ինչ ասված է:

Ես ուրախ եմ, որ մենք հետևողական քայլեր ենք անում այս ուղղությամբ, բայց չպետք է կանգնենք ուղղակի գովազդներն արգելելու վրա: Կառավարությունն աշխատում է շահումով խաղերի հարկման նոր, առավել արդյունավետ  համակարգեր ստեղծելու ուղղությամբ:

Մենք սարսափով ենք արձանագրում, որ սոցիալական նպաստ ստացող շատ քաղաքացիներ իրենց նպաստները ծախսում են  խաղադրույքներ կատարելու վրա: Մենք պետք է գործուն քայլեր ձեռնարկենք սրան վերջ տալու համար: Այս դեպքում հարց է ծագում, թե ինչու է պետությունը նրանց վճարում»։

Փաշինյանն ընդգծեց, որ պետությունը խաղադրույքներ թույլ կտա իրականացնել միայն բանկային քարտերից և հաշիվներից, ինչը  նշանակում է խաղադրույք կատարած ցանկացած մարդու նույնականացնել:

Մանրամասները՝ տեսանյութում։