Ե՞րբ սպասել գների նվազման․ պատասխանում է ԿԲ նախագահը․ ՏԵՍԱՆՅՈՒԹ

Գնաճը որոշակիորեն զսպելու համար ՀՀ կենտրոնական բանկի այսօր կայացած խորհրդի նիստում որոշվել է վերաֆինանսավորման տոկոսադրույքը բարձրացնել 0.5 տոկոսով՝ սահմանելով 10,5%։

Այս պահին գնաճը ՀՀ-ում կազմում է 9,9 տոկոս, 2022թ–ի ավարտին գնաճը կհասնի 10 տոկոսի։ Այս մասին այսօր հրավիրված աուլիսում հայտարարեց ԿԲ նախագահ Մարտին Գալստյանը։

Ե՞րբ սպասել գների նվազման՝ գոնե ներկրվող ապրանքների մասով։ Այս հարցին ի պատասխան՝ ԿԲ նախագահը նշեց․ «Մյուս տարվա համար մենք մեր կանխատեսումներում ակնկալում ենք, որ համաշխարհային ապրանքային շուկաներում որոշակի նվազում արդեն կսկսվի դիտվել։ Շատ դժվար է կանխատեսել պրոցեսները, որոնք տնտեսական հարթություններից դուրս են։ Օրինակ` Ռուսաստանը օրերս հայտարարեց, որ դուրս է գալիս Սև ծովով ցորենի մատակարարումների պայմանավորվածությունից։ Այդ տիպի զարգացումներ կանխատեսելը շատ դժվար է, որովհետև դրանք դուրս են տնտեսական տրամաբանությունից։ Այդուհանդերձ, աշխարհի զարգացած երկրներում` ԵՄ գոտում, ԱՄՆ–ում, Չինաստանում 2023թ–ի համար կանխատեսվող ցածր տնտեսական աճը, ԿԲ նախագահի խոսքով, թույլ է տալիս նաև գնաճի որոշակի դանդաղում ակնկալել»։

ԿԲ նախագահի դիտարկմամբ` հայաստանյան տնտեսվարողները ևս պետք է սկսեն մտածել գները նվազեցնելու մասին` համապատասխանեցնելով գները դոլարի ու եվրոյի նվազող փոխարժեքներին։

«Հիմնական գործոնը, որ կարող է այդ գործընթացը դանդաղեցնել կամ խոչընդոտել, այս ահռելի պահանջարկն է, որը ստեծվել է միջազգային այցելուների կողմից։ Տնտեսությունում «գերտաքացած» իրավիճակ է, խանութներում հերթեր են, այնպիսի ապրանքների ու ծառայությունների գներն են աճում, որ ես չեմ հիշում, թե Հայաստանում վերջին անգամ երբ էին թանկացել»,- նշեց Գալստյանը՝ հավելելով, որ ԿԲ գործողություններն ուղղված են այդ պահանջարկը, «գերտաքացումը» որոշակիորեն զսպելուն։

Մանրամասները՝ տեսանյութում։