13.04.2026 | 18:49
Արմեն Բաբալարյան․ «Արթուր Ալեքսանյանը մեկ ամիս բուժվել է Գերմանիայում, իսկ հիմա գորգի վրա է, մարզվում է»
Հյուրանոցային համարների դեֆիցիտ ունենք․ ըստ Քերոբյանի՝ բազմաթիվ զբոսաշրջիկների չեն կարողացել տեղավորել․ ՏԵՍԱՆՅՈՒԹ
Տնտեսություն
01.11.2022 | 12:15
2022թ–ի հուլիս–օգոստոսին Հայաստանի հյուրանոցային ամբողջ կարողությունները զբաղված են եղել։ Այս առումով Հայաստանի տնտեսության արտադրողականությունը բավական ցածր է։ Այս մասին այսօր ԱԺ–ում հայտնեց ՀՀ էկոնոմիկայի նախարար Վահան Քերոբյանը` ներկայացնելով Հայաստանում զբոսաշրջության ոլորտի վիճակն ու զարգացման հնարավորությունները։
Նախարարի խոսքով`հյուրանոցային համարների դեֆիցիտ ունենք, բազմաթիվ զբոսաշրջիկների չեն կարողացել տեղավորել, հատկապես լեցուն են եղել Երևանի և Գյումրու հյուրանոցներն ու հյուրատները։
«Նույնիսկ այլ երկրների բոսաշրջային ընկերությունները մեզ ասել են, որ ստիպված են եղել մերժել Հայաստան այցելությունների հայտերը կամ Հայաստան տոմսեր վաճառել, որովհետև չեն կարողացել տեղավորել»,- նշեց Քերոբյանը։
Հայաստանի զբոսաշրջության առանձնահատկությունը՝ խնդիրը, ըստ Էկոնոմիկայի նախարարի, ընդգծված սեզոնայնությունն է։ Հուլիս – օգոստոսն ամենապահանջված ամիսներն են, նոյեմբեր–ապրիլ ժամանակահատվածում ամենացածր ցուցանիշն է այս առումով։
Էկոնոմիկայի նախարարությունը խնդրի երկու հիմնական լուծում է առաջարկում` ավելացնել հյուրանոցային կարողությունները` ամառային հոսքն ապահովելու համար և զարգացնել ձմեռային սեզոնի զբոսաշրջային ծրագրերը։
Քերոբյանը նշեց, որ կառավարությունն այժմ մի շարք սուբսիդիոն ծագրեր է իրականացնում հյուրատների, վարձով տրվող բնակարանների վերանորոգման, էներգախնայողականության բարձրացման ուղղությամբ։ Նախարարը հույս հայտնեց, որ այս ծրագիրը հատկապես կհետաքրքրի գյուղերում մեծ տներ ունեցողներին։
Նշենք, որ վերջին տվյալների համաձայն` Հայաստան այցելած զբոսաշրջիկների միջին թիվը կազմել է տարեկան 1.24 մլն մարդ։ Կառավարության գործունեության ծրագրով 2026թ․ նախատեսվում է այդ թիվը հասցնել 2.5 մլն–ի։
2023թ–ի պետական բյուջեի նախագծով զբոսաշրջության ոլորտի զարգացմանը տրամադրվել է 7,66 մլրդ դրամ։
Մանրամասները՝ տեսանյութում։
