Ֆինլանդիայի պատվիրակությունը կայցելի Թուրքիա՝ քննարկելու ՆԱՏՕ-ին անդամակցության գործարքը

Ֆինլանդիայի պատվիրակությունը նոյեմբերի 1-ին պատրաստվում է այցելել Թուրքիա՝ Անկարայի կողմից փնտրվող «ահաբեկիչների» արտահանձնման վերաբերյալ տեխնիկական բանակցություններ անցկացնելու համար, գրում է Bianet-ը։

Նշվում է, որ Ֆինլանդիայի Արդարադատության նախարարության պաշտոնյաներն Անկարայում հանդիպելու են Թուրքիայի Արդարադատության նախարարության արտաքին կապերի և Եվրամիության հարցերի դեպարտամենտի գլխավոր տնօրեն Քասըմ Չիչեքի գլխավորած պատվիրակության հետ։ Հանդիպման ընթացքում թուրք պաշտոնյաները կրկնելու են Ֆինլանդիայի պատվիրակությանն ուղղված իրենց խնդրանքը՝ արտահանձնել Քուրդիստանի աշխատավորական կուսակցության (PKK) և FETÖ-ի անդամներին, որոնք, իբր, պատասխանատու են 2016 թվականի հեղաշրջման փորձի համար:

Հիշեցնենք, որ Ուկրաինա Ռուսաստանի ներխուժումից հետո Շվեդիան և Ֆինլանդիան դիմեցին ՆԱՏՕ-ին՝ անդամակցելու համար, սակայն Թուրքիան դեմ արտահայտնվեց դրան՝ քննադատելով երկու երկրներին, իբր, «ահաբեկչական խմբերին աջակցելու համար»։

Այնուհետև Մադրիդում հունիսին ՆԱՏՕ-ի գագաթնաժողովի շրջանակում երեք երկրները հռչակագիր ստորագրեցին, որով Շվեդիան ու Ֆինլանդիան պարտավորվեցին պայքարել Անկարայի նշած «ահաբեկչական խմբավորումների դեմ ու արտահանձնել» դրանց անդամներին։

Հավելենք, որ Թուրքիան և Հունգարիան միակ երկրներն են մնում, որոնք դեռ չեն վավերացրել ՆԱՏՕ-ին Շվեդիայի ու Ֆինլանդիայի անդամակցության հայտը։

Էմմա Չոբանյան