18.08.2026 | 14:57
Անձնական տվյալների պաշտպանության գործակալությունը հորդորում է չտարածել Երևանում հայտնաբերված նորածնի դեմքը
Գերմանիայում՝ 70 տարվա մեջ առաջին անգամ երկնիշ գնաճ է գրանցվել
Քաղաքականություն
21.10.2022 | 22:25
Գերմանիայի տնտեսությունը, ըստ երևույթին, գտնվում է անկման եզրին: Շարունակվող բարձր գնաճը, ինչպես նաև էներգակիրների մատակարարումների և դրանց արժեքի վերաբերյալ անորոշությունը ուժեղ ճնշում գործադրեցին Գերմանիայի տնտեսական իրավիճակի վրա։ Այս մասին ասված է Գերմանիայի Դաշնային բանկի (Bundesbank) ամենամսյա հաշվետվության մեջ, որը հրապարակվել է ուրբաթ՝ հոկտեմբերի 21-ին, գրում է DW-ի ռուսական ծառայությունը։
Սպառողական գների ներդաշնակեցված ինդեքսի (ՀՍԳԻ) հիման վրա հաշվարկված գնաճը սեպտեմբերին կազմել է 10,9 տոկոս (օգոստոսի 8,8 տոկոսի դիմաց)։
Նախորդ ամիսներին սկսված բացառիկ թանկացումները շարունակվել են։ Հիմնականում միտումը կապված է եվրոպական էներգետիկ շուկաների վրա շարունակվող ճնշման հետ: Ընդհանուր առմամբ, ներմուծման գներն օգոստոսին, նախորդ տարվա համեմատ, աճել են մոտ 33 տոկոսով, գերմանական ապրանքներինը՝ մոտ 46 տոկոսով։
«Օրինակ՝ էլեկտրաէներգիայի և գազի ներքին շուկայում իրացումները եռապատիկ աճ են գրանցել»,- ընդգծվում է զեկույցում։
Փորձագետների կարծիքով՝ առաջիկա ամիսներին Գերմանիայում գնաճի մակարդակը, ամենայն հավանականությամբ, կմնա երկնիշ թվերով (70 տարվա մեջ առաջին անգամ), նույնիսկ եթե որոշ թուլացումներ ուժի մեջ մտնեն։ Խոսքը, մասնավորապես, հոկտեմբերից գազի և կենտրոնացված ջեռուցման դրույքաչափի նվազեցման մասին է։
Դեկտեմբերին տնային տնտեսություններին գազի մեկամսյա վճարի գումարը վերադարձնելու առաջարկը նույնպես պարտադիր չէ, որ դանդաղեցնի գնաճի արագացումը։
«Դա կախված է նրանից, թե ինչպես է պետական սուբսիդավորումը հասնում տնային տնտեսություններին և, հետևաբար, ինչպես կանդրադառնա այս քայլը գների պաշտոնական չափման վրա»,- նշում են փորձագետները։
Տաթև Ֆռանգյան
