15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
Ռուսաստանը հարձակվում է ուկրաինական էլեկտրակայանների վրա՝ դեպի ԵՄ ուկրաինական միգրացիայի նոր ալիք առաջացնելու համար․ Զելենսկի
Քաղաքականություն
21.10.2022 | 14:38
Ուկրաինայի նախագահ Վլադիմիր Զելենսկին հայտարարել է, որ Ռուսաստանը հարձակվում է ուկրաինական էլեկտրակայանների վրա՝ դեպի ԵՄ ուկրաինական միգրացիայի նոր ալիք հրահրելու համար։ Այս շաբաթվա սկզբին Զելենսկին բացահայտել էր, որ Ռուսաստանն արդեն ոչնչացրել է երկրի էլեկտրակայանների մոտ մեկ երրորդը, ինչը հանգեցրել է էլեկտրաէներգիայի և ջրի անջատումների։ Հինգշաբթի Կիևն առաջին անգամ սահմանափակումներ է մտցրել ողջ երկրում էլեկտրաէներգիայի մատակարարման հարցում, գրում է VOA-ն։
ՄԱԿ-ի տվյալներով՝ 7,7 միլիոն ուկրաինացիներ, որոնք երկրի նախապատերազմյան բնակչության մոտ 19%-ն են, այժմ ապրում են Եվրոպայում՝ փետրվարին Ուկրաինա ռուսական ներխուժումից հետո: Որոշ փախստականներ դժվարանում են պատշաճ վարձատրվող աշխատանք գտնել:
«Ռուսաստանը հրահրում է ուկրաինացիների միգրացիայի նոր ալիք դեպի ԵՄ երկրներ»,- ասել է Զելենսկին ԵՄ գագաթնաժողովի մասնակիցներին ուղղված տեսաուղերձում։
Զելենսկու գրասենյակը հրապարակել է նրա ելույթի ձայնագրությունը։
«Ռուսական ահաբեկչությունը մեր էներգետիկ օբյեկտների դեմ ուղղված է նրան, որ այս աշնանն ու ձմռանը Ուկրաինայի համար էլեկտրաէներգիայի և ջերմության հետ կապված հնարավորինս խնդիրներ առաջանան, որպեսզի ավելի շատ ուկրաինացիներ մեկնեն եվրոպական երկրներ»,- ասել է նա։
Զելենսկու խոսքով՝ անհրաժեշտ է Կիևին տրամադրել հակաօդային պաշտպանության ավելի շատ համակարգեր և լրացուցիչ պատժամիջոցներ սահմանել Իրանի դեմ՝ Մոսկվային անօդաչու սարքեր մատակարարելու համար։
Տաթև Ֆռանգյան
