Իրանական ԱԹՍ-ների մատակարարումը ՌԴ-ին միջազգային պատժամիջոցների խախտում է․ ԱՄՆ

ԱՄՆ-ը հայտարարել է, որ Իրանի կողմից Ռուսաստանին մարտական անօդաչու թռչող սարքերի մատակարարումը խախտում է ՄԱԿ-ի պատժամիջոցները, և որ Ռուսաստանը պատասխանատվություն կկրի այդ ԱԹՍ-ների օգտագործմամբ կատարված ռազմական հանցագործությունների համար, գրում է BBC-ի ռուսական ծառայությունը։

Հիշեոցնենք՝ երկուշաբթի օրը Կիևը հարձակման էր ենթարկվել իրանական արտադրության կամիկաձե անօդաչու թռչող սարքերի կողմից։

ԱՄՆ-ը համաձայն է Ֆրանսիայի և Մեծ Բրիտանիայի հետ, որ այդ անօդաչու թռչող սարքերի մատակարարումը խախտում է ՄԱԿ-ի Անվտանգության խորհրդի 2231 բանաձևը, հայտարարել է ԱՄՆ Պետդեպարտամենտը: Այս բանաձևը, որը կապված է Իրանի միջուկային գործարքի հետ, արգելում է Իրանի կողմից որոշակի ռազմական տեխնոլոգիաների փոխանցումը։ Ուկրաինան հայտարարել է, որ ՌԴ կողմից կիրառված անօդաչու թռչող սարքերը (ԱԹՍ) իրանական Shahed-136 անօդաչու թռչող սարքեր են:

Ըստ ԱՄՆ-ի՝ Իրանը նախատեսում է հարյուրավոր անօդաչու թռչող սարքեր մատակարարել Ռուսաստանին՝ յուրաքանչյուրը մոտ 20 հազար դոլար արժողությամբ։ «Մենք կարծում ենք, որ այս անօդաչու թռչող սարքերը, որոնք Իրանի կողմից փոխանցվել են Ռուսաստանին և օգտագործվել են Ռուսաստանի կողմից Ուկրաինայում, այն զենքերից են, որոնք մնում են էմբարգոյի տակ՝ համաձայն 2231 բանաձևի», – ասել է ԱՄՆ Պետդեպարտամենտի խոսնակ Վեդանտ Պատելը։

Իրանը թեև հերքում է Ռուսաստանին անօդաչու թռչող սարքերի մատակարարումը, սակայն Պատելն հայտարարել է, որ ԱՄՆ-ը «հրապարակայնորեն բացահայտել է, որ Ռուսաստանը Իրանից անօդաչու թռչող սարքեր է ստացել»: