Պուտինը սխալ հաշվարկ է կատարել Ուկրաինա ներխուժման հարցում․ Բայդեն

Ռուսաստանի նախագահ Վլադիմիր Պուտինը ռացիոնալ քաղաքական գործիչ է, սակայն «էականորեն սխալ է հաշվարկել» Ուկրաինա ռազմական ներխուժումը։ Նման հայտարարությամբ է հանդես եկել ԱՄՆ նախագահ Ջո Բայդենը CNN-ին տված հարցազրույցում, որից հատվածներ են հրապարակվել հոկտեմբերի 11-ի երեկոյան։

Միևնույն ժամանակ, Բայդենն օգտագործել է «իռացիոնալ» տերմինը 2022 թվականի փետրվարին Պուտինի ելույթի կապակցությամբ, երբ արդեն ընդունված էր Ուկրաինա ներխուժելու որոշումը։

«Կարծում եմ՝ ելույթը, նրա նպատակները ռացիոնալ չէին։ Կարծում եմ՝ նա կարծում էր, որ իրեն գրկաբաց կդիմավորեն, որ Կիևը մայր Ռուսաստանի տունն է, և որ իրեն այստեղ կդիմավորեն ուրախությամբ։ Կարծում եմ՝ նա պարզապես ամբողջովին սխալ հաշվարկ է կատարել»,- հայտարարել է ԱՄՆ ղեկավարը Ջեյք Թեփերին տված հարցազրույցում։

Բայդենը նաև ասել է, որ չի հավատում, թե Պուտինը կհամարձակվի մարտավարական միջուկային զենք կիրառել Ուկրաինայում։

«Չեմ կարծում, որ նա դա կանի։ Կարծում եմ՝ նրա կողմից այդ մասին խոսելն անպատասխանատու է»,- լրագրողի համապատասխան հարցին այսպես է պատասխանել ԱՄՆ նախագահը։

Սպիտակ տան ղեկավարի խոսքով՝ Ուկրաինայում նման զենքի կիրառումը «կարող է սարսափելի հետևանքներ ունենալ»։ Նա ուղղակիորեն չի պատասխանել Վաշինգտոնի հնարավոր արձագանքի մասին հարցին՝ այն դեպքում, երբ Ռուսաստանը, այնուամենայնիվ, հատի «կարմիր գիծը», սակայն նշել է, որ Պենտագոնը «նախապես մշակել է փոխադարձ տարբերակներ՝ նման սցենարի իրականացման դեպքում»։

Հարցին, թե նոյեմբերին Ինդոնեզիայում G20-ի գագաթնաժողովում կհանդիպի՞ Վլադիմիր Պուտինի հետ, Բայդենը պատասխանել է, որ նման հանդիպման համար ոչ մի համոզիչ պատճառ չի տեսնում:

Տաթև Ֆռանգյան