Կուրսանտի գործով դատավճռից 6 ամիս անց կողմերը դեռևս չեն ստացել վճռի ամբողջական փաթեթը

2015 թվականի հունվարի 28-ի լույս 29-ի գիշերը Վազգեն Սարգսյանի անվան ռազմական ինստիտուտում առանձնակի դաժանությամբ սպանված կուրսանտ Հայկազ Բարսեղյանի գործով վճիռը հրապարակումից ավելի քան 6 ամիս անց դեռևս դատավարական կողմերին չի տրամադրվել։ Factor.am-ի հետ զրույցում տուժող կողմի իրավահաջորդի ներկայացուցիչ Անի Թորոսյանն ասաց՝ սպասում են վճռի փաստաթղթերին, որ կարողանան բողոքարկել։

«Երբ դատավճիռը տրամադրեն, մեր բողոքարկման ժամկետն այդ ժամանակից էլ ուժի մեջ կմտնի, այդ մասով որևէ խնդիր չունենք։ Սակայն փաստն այն է, որ դեռ չունենք վճիռը»,- նշեց Թորոսյանը։

Նշենք, որ աղմկահարույց գործի դատավճիռը հրապարակվեց դեպքից 7 տարի անց՝ ապրիլի 5-ին։ Սպանության մեջ մեղադրվող անձանց արարքը վերաորակվեց մի խումբ անձանց կամ կազմակերպված խմբի կազմում սպանության, և 4 մեղադրյալներն էլ` Գնել Թևոսյանը, Վաչե Սահակյանը, Նորիկ Սահակյանը, Մովսես Ազարյանը դատապարտվեցին 15 տարի ժամկետով ազատազրկման:

Հիշեցնենք, որ Հայկազ Բարսեղյանը սպանվել է 2015-ի հունվարի 29-ին: Այդ օրն առավոտյան նրա մարմինը հայտնաբերվել է Վազգեն Սարգսյանի անվան ռազմական ինստիտուտի բակում՝ պտտաձողից կախված:

Ըստ մեղադրանքի` ամբաստանյալները Հայկազին սպանել են գիշերը՝ անկողնում, ապա ինքնասպանության տպավորություն ստեղծելու համար նրան տարել ու կախել են ինստիտուտի սպորտհրապարակում։ Ամբաստանյալներին վերագրվող արարքը որակվել է խմբի կազմում, խուլիգանական դրդումներով, առանձին դաժանությամբ սպանություն, (Քրեական օրենսգրքի 104-րդ հոդվածի 2-րդ մասի 5,-րդ, 7-րդ և 10-րդ կետերով), նրանք իրենց առաջադրված մեղադրանքը չեն ընդունել, այժմ, փաստորեն, դատարանը նրանց արարքը վերաորակել է Քրեական օրենսգրքի 104-րդ հոդվածի 2-րդ մասի 7-րդ կետով:

Նշենք, որ Դատախազությունը մեղադրական ճառով ավելի խիստ պատիժներ էր պահանջել ամբաստանյալների համար, մասնավորապես` Գնել Թևոսյանի և Վաչե Սահակյանի համար` 20-ական, իսկ Նորիկ Սահակյանի ու Մովսես Ազարյանի համար` 18-ական տարի ազատազրկում, իսկ սպանվածի հայրը` Արկադի Բարսեղյանը պնդում է, որ 4 ամբաստանյալներին էլ պետք է ցմահ ազատազրկման դատապարտել։

Ռոզա Վարդանյան