21.03.2026 | 20:02
ԱՄՆ-ի Հավայի նահանգում 5,5 հազար մարդ կտարհանվի ջրհեղեղի պատճառով
29 ուսանող արժանացել է ՏՏ ոլորտում ՀՀ վարչապետի կրթական մրցանակների
Հասարակություն
10.10.2022 | 16:44
Տեղեկատվական տեխնոլոգիաների ոլորտը զարգացնելու, կատարելագործելու և խրախուսելու նպատակով բուհերի լավագույն ուսանողների, ասպիրանտների և աշակերտների համար ՀՀ կառավարության որոշմամբ սահմանվել է կրթական 6 մրցանակ, որոնք շնորհվում են ամեն տարի. տեղեկացնում են ՀՀ ԿԳՄՍՆ-ից։
Այս տարի արդեն 18-րդ անգամ տեղի է ունեցել կրթական պարգևների հանձնման մրցանակաբաշխությունը, որի ընթացքում 29 ուսանող արժանացել է ՏՏ ոլորտում ՀՀ վարչապետի կրթական մրցանակների:
Փոխվարչապետ Մհեր Գրիգորյանը «Սինոփսիս Արմենիա» ընկերության գիտաարտադրական համալիրում կազմակերպված արարողության ժամանակ Վարչապետի անունից հանձնել է կրթական մրցանակները: Մրցանակների հանձնման արարողությանը մասնակցել են նաև ՀՀ կրթության, գիտության, մշակույթի և սպորտի նախարարի տեղակալ Կարեն Թռչունյանը, «Սինոփսիս» ընկերության նախագահ ու գլխավոր գործառնական տնօրեն Սասին Ղազին և «Սինոփսիս Արմենիա» ընկերության տնօրեն Հովիկ Մուսայելյանը:
Շնորհավորելով բոլոր մրցանակակիրներին՝ փոխվարչապետ Մհեր Գրիգորյանը նշել է. «Ինձ համար պատիվ է այսօր Վարչապետի անունից շնորհելու ՏՏ բնագավառում 2022 թվականի կրթական մրցանակները: Գաղտնիք չէ, որ տեղեկատվական տեխնոլոգիաների զարգացումն ունի ռազմավարական նշանակություն մեր երկրի համար: Մերօրյա իրականության մեջ այդ ոլորտի զարգացումը կարևորում ենք ոչ միայն տնտեսական տեսանկյունից, այլ նաև դիտարկում որպես բոլոր առանցքային և կենսական նշանակություն ունեցող ոլորտների, ի վերջո նաև՝ մարդկային կապիտալի զարգացման շարժիչ ուժ: Դուք ձեր գիտելիքներով, ստեղծարարությամբ և հմտություններով ստեղծում եք վաղվա Հայաստանը: Ցանկանում եմ, որպեսզի այս մրցանակը լինի ամենափոքրը ձեր ապագա գործունեության մեջ ու ստեղծի նոր հնարավորություններ: Մաղթում եմ մշտապես շարժվել ժամանակին համահունչ, զգալ ՏՏ ոլորտում համաշխարհային միտումները և նույնիսկ դրանցից առաջ անցնել»: Փոխվարչապետը շնորհակալություն է հայտնել «Սինոփսիս» ընկերությանը՝ այս կարևոր միջոցառումը նախաձեռնելու և տարիներ շարունակ կազմակերպելու համար:
«Սինոփսիս» ընկերության նախագահ ու գլխավոր գործառնական տնօրեն Սասին Ղազին էլ իր հերթին նշել է՝ ՏՏ-ն դառնում է շատ ավելին, քան պարզապես լավ աշխատանքը. այն սկսում է փոխել մարդկանց կենսակերպը. «Սա ոլորտ է, որը ոչ միայն ֆինանսական առումով ձեզ կբավարարի, այլ մեծագույն բավարարվածություն կբերի առ այն, թե ինչպես եք դուք իսկապես փոխում մարդկանց, տնտեսության, երկրի հաղորդակցման ձևերը»:
«Սինոփսիս Արմենիա» ընկերության տնօրեն Հովիկ Մուսայելյանի խոսքով՝ տեղեկատվական տեխնոլոգիաները Հայաստանի տնտեսության զարգացման գերակայությունն են: «Հայաստանում այսօր գործում են շուրջ 3000 ՏՏ ընկերություններ, որոնց հիմնական կորիզը կազմում են մեր տաղանդաշատ պատանիները. նրանցից շատերը նաև այս մրցանակաբաշխության միջոցով են բացահայտվել և խրախուսվել: Մրցանակաբաշխությունը կազմակերպելու մեր հիմնական խնդիրն այն էր, որ մեր տաղանդաշատ պատանիներին ուղղորդենք դեպի գիտակրթական ոլորտ և տեխնոլոգիական ձեռներեցություն»,-նշել է նա՝ ընդգծելով, որ մրցանակաբաշխությունը «Սինոփսիս» ընկերությունն իրականացնում է «Հայաստան» համահայկական հիմնադրամի հետ համատեղ:
Հայ-ռուսական համալսարանի ուսանող Նոնա Պետրոսյանը, որն աշխատում է «Սինոփսիս Արմենիա» ընկերությունում, մեզ հետ զրույցում շնորհակալություն է հայտնել իր դասախոսներին, որոնք, անկախ ուսումնական գործընթացի դժվարություններից, պահել են հետաքրքրությունը ուսման և անձնային աճի նկատմամբ։
«Հետաքրքիր միջոցառում էր, որն ունի հետաքրքիր նպատակներ: ՏՏ ոլորտը շատ կարևոր է, և պետք է այս ոլորտում հաջողությունները շատ լինեն, քանի որ դրանք ծառայում են երկրի զարգացմանը»,-նշում է մեկ այլ մրցանակակիր՝ Չինար Մովսիսյանը:
Նշենք, որ յուրաքանչյուր անվանակարգի համար բուհերը ներկայացրել են 10-ական ուսանողներ: Այս տարի հարցազրույցներին մասնակցել է 6 բուհի 116 ուսանող, որոնցից մրցանակի է արժանացել 29-ը: Գլխավոր մրցանակ այն տարի չի շնորհվել: «Լավագույն մագիստրանտ»` 1-ին և 2-րդ կարգի մրցանակների համար նախատեսված է համապատասխանաբար 750 և 500 ԱՄՆ դոլարին համարժեք ՀՀ դրամ, յուրաքանչյուր կարգում՝ 6 մրցանակակիր, «Լավագույն բակալավր»` 1-ին և 2-րդ կարգի մրցանակների համար՝ համապատասխանաբար 500 և 400 ԱՄՆ դոլարին համարժեք ՀՀ դրամ, յուրաքանչյուր կարգում՝ 6 մրցանակակիր, իսկ «Լավագույն ասպիրանտ»` 1-ին և 2-րդ կարգի մրցանակների համար՝ համապատասխանաբար 1000 և 750 ԱՄՆ դոլարին համարժեք ՀՀ դրամ, յուրաքանչյուր կարգում՝ 6 մրցանակակիր:
