11.01.2025 | 20:13
Կրակը Գլենդելից հեռու է. քաղաքապետը մանրամասներ է ներկայացրել
Դատարանը հրապարակում է «Զինված խմբի գործով» 20 ամբաստանյալների դատավճիռը․ ՈՒՂԻՂ
Հասարակություն
10.10.2022 | 12:05
Երևան քաղաքի ընդհանուր իրավասության դատարանի Կենտրոնի նստավայրում՝ դատավոր Մեսրոպ Մակյանի նախագահությամբ, շուրջ 7 տարի տևած քննությունից հետո, այսօր հրապարակվում է պաշտպանության նախարարի նախկին տեղակալ Վահան Շիրխանյանի և մյուսների վերաբերյալ «Նորքի զինված խումբ» անունը ստացած քրեական գործով դատավճիռը։
Հիշեցնենք՝ 2015-ի նոյեմբերի 25-ին ԱԱԾ-ն հայտարարություն տարածեց այն մասին, որ Նորք–Մարաշում վնասազերծվել է զինված խումբ: Ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել էր բռնությամբ զավթել իշխանությունը: Մասնավորապես, ըստ մեղադրանքի, նրանք ծրագրել էին թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության և այլ հաստատությունների շենքերի վրա: Այս գործով ամբաստանյալի կարգավիճակում է 20 անձ, այդ թվում՝ պաշտպանության նախկին փոխնախարար Վահան Շիրխանյանը, Գյումրու Կաթոլիկ եկեղեցու քահանա Անտոն Դիկրան Թոթոնջյանը և այլք։ Դատախազը մեղադրական ճառի ժամանակ դատարանից պահանջել է մեղավոր ճանաչել գործով անցնող 20 ամբաստանյալներին՝ դատապարտելով ազատազրկման՝ 10-16 տարի ժամկետով։
Մասնավորապես, Վահան Շիրխանյանի համար պահանջել է 13 տարի, Արթուր Վարդանյանի համար, որն ըստ մեղադրանքի համարվում է զինված խմբի պարագլուխը,16 տարի ժամկետով, իսկ Նելլի Մինասյանի համար՝ 10 տարի ժամկետով ազատազրկում։ Նշենք, որ այս ընթացքում գործով մի քանի դատավոր է փոխվել, ինչը պարբերաբար երկարաձգում էր գործի քննությունը։ 2019 թ օգոստոսից գործը քննում է դատավոր Մեսրոպ Մակյանը։
Մանրամասները՝ տեսանյութում։
