Չնայած մեր բացառիկ ներուժին` չենք կարողանում ուշքի գալ, կտրվել ենք իրականությունից. Նարինե Դելլալյան․ՏԵՍԱՆՅՈՒԹ

«Հայաստանցին համարում է, որ սփյուռքահայը երկրում կատարվողի մասին խոսք ասելու իրավունք չունի, մինչդեռ նա պետք է սփյուռքը դիտարկի որպես հարստություն: Հայաստանն ու սփյուռքը պարտավոր են համատեղել իրենց ուժերը: Չեմ ընդունում այն պնդումը, թե միայն հայրենիքում ապրողներն իրավունք ունեն խոսելու Հայաստանի մասին»,- Factor TV-ի հետ զրույցում նման տեսակետ է հայտնում ջութակահար, Պորտուգալիայի սիմֆոնիկ նվագախմբի մենակատար Նարինե Դելլալյանը: Նա շեշտում է` Հայաստանում բոլորը մտահոգ են, անորոշություն կա վաղվա օրվա հետ կապված. «Նկատում եմ, որ մեր երիտսարդները բացառիկ ներուժ ունեն, սակայն, ցավոք, չենք կարողանում ուշքի գալ և զարգացնել, առաջ տանել մեր երկիրը»:

Նարինե Դելլալյանի խոսքով` ցավալի է կորուստներն ընդունելը, բայց հարկավոր է հաշվի նստել իրականության հետ. «Մենք կարծես կտրվել ենք իրականությունից, շատ ենք Հայաստանի մեջ ապրում, չենք նայում դուրս…Մենք պետք է ազգայինի ուղուց դուրս գանք դեպի համամարդկայինի ուղի»: Ջութակահարուհին խոսում է նաև Հայաստանում մշակութային միջավայրի և դրա վրա պատերազմի ազդեցության մասին. «Բարեբախտաբար, մշակութային միջավայրը Հայաստանում շատ ակտիվ է, շատ են իրադարձությունները. դա ուրախալի է: Պատերազմի օրերին մարդիկ էլ ավելի շատ ունեն հոգևոր սննդի կարիք: Ստեղծագործողն էլ այս օրերին ասում է իր խոսքը` ժամանակի սրությունն իր մեջ կրելով»:

Նարինե Դելլալյանն անդրադառնում է նաև պետության համար վճռորոշ պահերին մտավորականի դերին և տեսակետ հայտնում, որ մտավորականը նա է, ով կարողանում է ուղղորդել հասարակությանը. «Նա պետք է այդ դերն իր վրա վերցնի և տանի հասարակությանն իր հետևից: Նա կարևոր խոսք ասելու պարտավորություն պետք է ունենա.մենք դա չենք լսում: Կոստան Զարյանի երազած արարատյան մարդը այսօր հասարակության փոքր շերտն է կազմում»:

Մանրամասները` տեսանյութում:

Աննա Բաբաջանյան