Բունդեսթագի իշխող խմբակցությունը հայտարարություն է տարածել ՀՀ-ի դեմ Ադրբեջանի ագրեսիայի վերաբերյալ

Բունդեսթագի իշխող Սոցիալ-դեմոկրատական կուսակցության (ՍԴԿ) խմբակցությունը հայտարարություն է տարածել`անդրադառնելով Հայաստանի դեմ Ադրբեջանի ագրեսիան։

«ՍԴԿ խորհրդարանական խմբակցությունը մեծ անհանգստությամբ է հետևել Ադրբեջանի և Հայաստանի միջև հակամարտության վերջին սրմանը, ներառյալ՝ հայկական տարածքում բնակավայրերի և քաղաքացիական ենթակառուցվածքների վրա հարձակումներին: Ադրբեջանի զանգվածային ռազմական գործողություններով Հայաստանի սահմանների և տարածքի խախտումը որևէ կերպ չի կարող արդարացվել։ Զոհեր և վիրավորներ, այդ թվում՝ քաղաքացիական անձինք, բազմաթիվ հայերի փախուստը հայրենի քաղաքներից, ինչպես նաև ադրբեջանական զինուժի կողմից հայ գերիների նկատմամբ ռազմական հանցագործությունների և դաժան վերաբերմունքի մասին հաղորդումներն անընդունելի են։ Ռազմական հանցագործությունների վերաբերյալ փաստերը պետք է ամբողջությամբ պարզաբանվեն»,- ասվում է հայտարարության մեջ։

Խմբակցությունը ողջունում է այն փաստը, որ Ադրբեջանի և Հայաստանի միջև թեժ մարտերի կրկին բռնկվելուց հետո, երկու երկրները, նաև միջազգային հանրության աջակցությամբ, համաձայնության են եկել հրադադարի շուրջ և ընթանում են բանակցություններ։

«Վերջերս հայ ռազմագերիների ազատ արձակումը նույնպես դրական ազդանշան է։ Երկու կողմերին էլ կոչ է արվում զերծ մնալ ցանկացած գործողությունից, որը կարող է վտանգել երկու երկրների և տարածաշրջանի միջև անվտանգությունը։ Մենք կոչ ենք անում Հայաստանին և Ադրբեջանին շարունակել երկխոսությունը։ Միայն բռնությունը դադարեցնելը և Հայաստանի ու Ադրբեջանի միջև կայուն խաղաղ լուծմանն ուղղված բանակցությունները և, վերջապես, Լեռնային Ղարաբաղի հակամարտության լուծումը կարող է հանգեցնել նրան, որ երկու երկրների ժողովուրդներն ապագայում կարողանան ապրել խաղաղության մեջ: Մենք մերժում ենք ռազմական միջոցներով փաստեր ստեղծելու փորձերը. երկու կողմերն էլ տասնամյակներ տևած հակամարտության ընթացքում ստիպված են եղել սգալ բազմաթիվ զոհերի համար, և կոչ է արվում անել առավելագույնը հանուն խաղաղ ապագայի»,- ասվում է հայտարարության մեջ ։

ՍԴԿ խմբակցությունը նաև կոչ է անում Դաշնային կառավարությունը, Եվրամիությունը և միջազգային հանրությունը՝ հետևել իրադարձություններին, շարունակել ինտենսիվ ջանքեր գործադրել երկու երկրների միջև միջնորդության ուղղությամբ և չընդունել միջազգային իրավունքի խախտումները։

Էմմա Չոբանյան