17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Թուրքիայի դատարանները սեպտեմբերին 60 լրագրողի են ազատազրկման դատապարտել
Քաղաքականություն
07.10.2022 | 23:30
Թուրքիայի դատարաններն անցյալ ամիս ընդհանուր առմամբ 27 տարվա ազատազրկման են դատապարտել 60 լրագրողների։ Այս մասին հայտնում է Ստոկհոլմի Ազատության կենտրոնը՝ վկայակոչելով 2022 թվականի սեպտեմբերի Մամուլի ազատության զեկույցը, գրում են թուրքական լրատվամիջոցները։
Ընդդիմադիր Ժողովրդահանրապետական կուսակցության (CHP) պատգամավոր Ուտկու Չաքըրոզերի կողմից հրապարակված զեկույցի համաձայն՝ 60 լրագրող դատապարտվել է 27 տարի, 7 ամիս և 19 օր ընդհանուր ժամկետով ազատազրկման՝ իրենց հոդվածների, մեկնաբանությունների կամ սոցիալական մեդիայում հաղորդագրությունների համար, նրանցից երկուսն էլ ձերբակալված են։
Զեկույցում նշվում է, որ ոստիկանության ճնշումը մամուլի ներկայացուցիչների նկատմամբ աճել է, տասնյակ լրագրողների բողոքի ակցիաների ու թուրքական քաղաքներում այլ իրադարձությունների ժամանակ սեպտեմբերին չեն կարողացել իրենց գործն անել՝ անվտանգության ուժերի կողմից ուժի կիրառման պատճառով։ Նաև ասվում է, որ կոռուպցիայի և կաշառակերության սկանդալների մասին լուրերը, որոնցում ներգրավված են պետական պաշտոնյաները և նրանց ընտանիքները, արգելափակվել են, և որ նման լուրեր հրապարակող որոշ լրատվական կայքերի հասանելիությունը կանխվել է։
«Սեպտեմբերը մամուլի ազատության համար տարվա ամենամութ ամիսն էր։ Թուրքիայում լրագրողներին ծեծում են, բանտարկում և արգելափակում։ Կառավարությունը, որից ակնկալվում էր բարելավել լրագրողների աշխատանքային պայմանները, Թուրքիայի խորհրդարան է ներկայացնում նոր օրինագծեր՝ ուժեղացնելու ճնշումներն ու գրաքննությունը։ Մենք թույլ չենք տա, որ նման օրինագծերը, որոնք ավելի կուժեղացնեն մամուլի վրա ճնշումը, անցնեն խորհրդարան»,- ասել է պատգամավոր Չաքըրոզերը։
Թուրքիայի իշխող «Արդարություն և զարգացում» կուսակցության կառավարությունը հատկապես 2016 թվականի պետական հեղաշրջման փորձից հետո է սաստկացրել լրատվամիջոցների նկատմամբ ճնշումները։
Էմմա Չոբանյան
