Թուրքիայի գլխավոր ընդդիմադիր կուսակցությունը պետական ինստիտուտներում կանանց գլխաշոր կրելու մասին օրինագիծ է ներկայացրել՝ վիճաբանություններ առաջացնելով

Թուրքական ընդդիմադիր կուսակցություններն աջակցում են երկրի գլխավոր ընդդիմադիր Ժողովրդահանրապետական կուսակցության (CHP) կողմից ներկայացված գլխաշորի օրինագծին, իսկ ահա կառավարությունը կուսակցության առաջնորդ Քեմալ Քըլըչդարօղլուին՝ օրինագծի հեղինակին մեղադրում է հարցը չարաշահելու համար, գրում են թուրքական լրատվամիջոցները։

Նշենք, որ Ժողովրդահանրապետական կուսակցությունն օրինագիծ է ներկայացրել խորհրդարան՝ պետական ինստիտուտներում կանանց գլխաշոր կրելու իրավունքն օրինականորեն ապահովելու համար։ Այն երկրում լուրջ քննարկումների ու տարաձայնությունների առիթ է դարձել։

1980 թվականի պետական հեղաշրջումից հետո Թուրքիայի պետական հաստատություններում, դպրոցներում և համալսարաններում արգելվել է գլխաշոր կրելը։ Նախագահ Ռեջեփ Թայիփ Էրդողանի իշխող «Արդարություն և զարգացում» կուսակցությունն արգելքը վերացրել է 2013 թվականին՝ բարեփոխումների փաթեթի շրջանակում։ CHP-ն կտրականապես դեմ էր հասարակական և կրթական հաստատություններում իսլամական գլխաշորերի կիրառմանը:

ԱԶԿ-ի խոսնակ Օմեր Չելիքը հայտարարել է, որ իր կուսակցությունը երկար ժամանակ ղեկավարել է իրավունքների և ազատությունների համար քաղաքական պայքարը։

Քրդամետ Ժողովուրդների դեմոկրատական կուսակցությունը նշել է, որ աջակցում է օրինագծին։ «Ապագա» կուսակցության առաջնորդ Ահմեդ Դավութօղլուն ևս պաշտպանել է Քըլըչդարօղլուի առաջարկը՝ կոչ անելով բոլոր քաղաքական կուսակցություններին և պատգամավորներին առաջ տանել այն։

Սակայն հայտնի իրավաբանները պնդում են, որ օրինագիծը ներկայացնելու կարիք չկա, քանի որ գլխաշոր կրելը երկրում արդեն օրինական է։

«Գլխաշոր կրելն արդեն իսկ թույլատրված է համալսարաններում։ Նախկինում դա իրավաբանորեն արգելված չէր, միայն դե ֆակտո էր արգելված»,- ասել է սահմանադրական իրավունքի փորձագետ, պրոֆեսոր Լևենթ Քյոքերը:

Նա նշել է, որ թուրքական օրենքները չեն ստիպում կնոջը հանրության առաջ հանել գլխաշորը, ուստի կուսակցության առաջարկի կարիքը չկա։

Էմմա Չոբանյան