Գեղամ Մանուկյանի որդին և Գոռ Սարգսյանը 3 մլն դրամ գրավի դիմաց ազատ կարձակվեն

ԱԺ «Հայաստան» խմբակցության պատգամավոր, ՀՅԴ անդամ Գեղամ Մանուկյանի որդին՝ Տարոն Մանուկյանը և ՀՅԴ ՀԵՄ ղեկավար Գոռ Սարգսյանը ժամեր անց ազատ կարձակվեն։ Այս մասին Factor.am-ի հետ զրույցում ասաց պաշտպան Աբգար Պողոսյանը՝ նշելով, որ Շիրակի մարզի ընդհանուր իրավասության դատարանը՝ դատավոր Ռոման Սմբատյանի նախագահությամբ, քիչ առաջ որոշում է կայացրել բավարարել իրենց միջնորդությունը և 3-ական միլիոն դրամ գրավի դիմաց փոխել ամբաստանյալների խափանման միջոց կալանքը. «Թեև, դեռևս դատարանի որոշումը չենք ստացել, սակայն կարող եմ ասել, որ դատարանի համար որպես հիմք է հանդիսացել այն հանգամանքը, որ պաշտպանյալների կողմից նվազել է նոր հանցանք կատարելու ռիսկը։ Այս պահին քաղվածքն ինձ մոտ է և Տարոնի ու Գոռի ազատության մեջ գտնվելու փաստը ժամերի հարց է ընդամենը»,- հավելեց պաշտպան Պողոսյանը։

Հիշեցնենք՝ ըստ նախաքննական մարմնի 2022 թվականի մայիսի 8-ին մի խումբ երիտասարդներ, իջնելով ավտոմեքենայից, մոտեցել էին Գյումրու Երևանյան խճուղում գտնվող հասարակական տրանսպորտի կանգառում կանգնած տարեց տղամարդկանց և սկսել հարվածներ հասցնել նրանց մարմնի տարբեր մասերին: Պարզվել էր, որ վերոնշյալ երիտասարդների հանցավոր արարքներից տուժած տղամարդիկ 74, 56, 72 և 84 տարեկան քաղաքացիներ են: Նախաքննության ընթացքում ձեռնարկված միջոցառումների արդյունքում պարզվել է ենթադրյալ հանցագործությունը կատարած անձանցից երեքի ինքնությունը. նրանցից մեկը Արագածոտնի մարզի՝ 1991թ. ծնված բնակիչ Գոռ Սարգսյանն է, մյուսը՝ Երևան քաղաքի 1999թ. ծնված բնակիչ Տարոն Մանուկյանը, իսկ երրորդը՝ Արարատի մարզի բնակիչ, 1990թ. ծնված Արսեն Մարտոյանն է: Գոռ Սարգսյանը և Տարոն Մանուկյանը ձերբակալվել են ՀՀ քրեական դատավարության օրենսգրքի 129-րդ հոդվածի կարգով, իսկ Արսեն Մարտոյանը ներգրավվել է որպես մեղադրյալ։ Հաջորդ օրը Մանուկյանը և Սարգսյանը կալանավորվել են։

Նշենք՝ երեկ ԵՊՀ արևելագիտության ֆակուլտետի դեկան Ռուբեն Մելքոնյանը ֆեյսբուքյան էջում գրառում էր կատարել, տեղեկացնելով, որ ստացել է Տարոն Մանուկյանին հեռացման հրամանը, որը, սակայն, հրաժարվել է ստորագրել. «Տարոն Մանուկյանը մասնակցել է դասընթացներին, սակայն չի կարողացել հանձնել քննությունները, քանի որ արդեն կալանավորված է եղել։ Նախ՝ կալանավայրում գտնվող Տարոնին ուղարկել եմ անհրաժեշտ գրականությունը, իսկ այնուհետև տեսնելով, որ խափանման միջոցը չի փոխվում և մոտենում է քննությունների լուծարքային շրջանը՝ զեկուցագրով դիմել եմ ռեկտորատ և հայտնել, որ արևելագիտության ֆակուլտետի դասախոսները և ես անձամբ պատրաստ ենք Տարոնի քննությունները ընդունել կալանավայրում՝ տեսակցությունների համար նախատեսվող տարածքում: Ինձ մոտ տպավորություն է, որ սկսվեց բյուրոկրատական գործընթաց, իսկ հետո բյուրոկրատական քաշքշուկ արդեն ԵՊՀ-ից դուրս՝ համապատասխան նախարարություններում: Իմ առաջարկը՝ քննությունները անցկացնել կալանավայրում, ըստ էության, մերժվեց՝ տարբեր պատճառաբանություններով»,- նշել էր դեկանը, հայտնելով իր անհամաձայնությունը հրամանի մասով։

Ռոզա Վարդանյան