18.08.2026 | 19:29
Երևանում, Արարատյան դաշտում ու 3 մարզում սպասվում է բարձր կարգի հրդեհավտանգ իրավիճակ
44-օրյա պատերազմի հանգամանքներն ուսումնասիրող հանձնաժողովի աշխատանքը երկարաձգվեց 6 ամսով
Քաղաքականություն
05.10.2022 | 10:59
2020 թվականի 44-օրյա պատերազմի հանգամանքներն ուսումնասիրող Ազգային ժողովի քննիչ հանձնաժողովի գործունեության ժամկետը կերկարաձգվի ևս 6 ամսով։ Նախագիծն այսօր ընդունվեց Ազգային ժողովում։
Հանձնաժողովի նախագահ, «Քաղաքացիական պայմանագիր» խմբակցության անդամ Անդրանիկ Քոչարյանը նախագծի քննարկման ժամանակ նշեց, որ ներկա պահին հանձնաժողովն ուսումնասիրում է 2022 թվականի հունիսի վերջին ՊՆ–ից ստացված՝ հանձնաժողովի կողմից պահանջված փաստաթղթերի փաթեթը։ «Այն ներառում է շուրջ 3500 օպերատիվ մակարդակի տեքստային և գրաֆիկական փաստաթղթեր, ընդհանուր` 10 000-ից ավելի էջ ծավալով, որը դեռ վերջնական չէ։ Այս երկու օրվա ընթացքում ստացել ենք էլի մեծ ծավալով մեզ հետաքրքրող փաստաղթեր ՊՆ–ից, որոնք գտնվում են ուսումնասիրման փուլում»,– նշեց Քոչարյանը։ Անդրանիկ Քոչարյանը նաև հայտնեց, որ հանձնաժողովը կազմել է այն անձանց ցանկը, որոնք քննիչ հանձնաժողովի աշխատանքների երկարացման դեպքում պետք է հրավիրվեն հանձնաժողովի նիստում պարզաբանումներ տալու։
«Երկու հրավիրյալների արդեն նամակ ուղարկել ենք, և Վարդան Օսկանյանը հեռավար եղանակով արդեն իր դժգոհությունն է արտահայտել, որը որևէ ձևով չի արտահայտում հանձնաժողովի աշխատանքներին նրա չմասնակցելու անհրաժեշտությունը։ Նա պետք է գա, և պետք է բոլորը գան»,– ասաց Քոչարյանը։
Հիշեցնենք, որ 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով քննիչ հանձնաժողովը ստեղծվել է 2022 թվականի թետրվարին։ Հանձնաժողովի գործունեության ժամկետը 6 ամիս է։
