Փաշինյանը մերժե՞լ է Պուտինին. ինչ է քննարկվել Միութենական պետության շուրջ․ ՏԵՍԱՆՅՈւԹ

Վարչապետ Նիկոլ Փաշինյանի ընտանիքին պատկանող «Հայկական ժամանակ» լրատվամիջոցը պնդում է՝ Կրեմլն ուզում է, որ Հայաստանը դառնա «Ռուսաստան-Բելառուս» միութենական պետության կամ Ռուսաստանի մաս, և դրան փորձում է հասնել Ադրբեջանի ու որոշ չափով՝ ՀՀ-ում տեղակայված ռուսական զորքերի միջոցով, բացի այդ՝ Հայաստանին զենք չվաճառելով։ «Հավաստի Աղբյուր» ստորագրությամբ հերթական հոդվածի հեղինակը պնդում է, որ Հայաստանում տեղակայված 102-րդ ռազմաբազան աշխատում է ՀՀ-ի ինքնիշխանության դեմ։

Քաղաքական մեկնաբան Դավիթ Ստեփանյանի կարծիքով՝ հոդվածագիրն անձամբ Փաշինյանն է։

Փաշինյանի հիմնադրած լրատվամիջոցն արդեն երկրորդ օրն է՝ անանուն հոդվածներ է հրապարակում և մանրամասնում, թե ինչ են ուզում Ադրբեջանն ու Ռուսաստանը Հայաստանից։ Ըստ ամենայնի՝ դրանք ուղղված են Հայաստանի նախկին նախագահներին, կաթողիկոսին և փորձագիտական շրջանակներին։ Առաջիկայում էլ ներկայացվելու են Վաշինգտոնի, Թեհրանի և Բրյուսելի մոտեցումների վերաբերյալ հոդվածները։ Այսօրվա հոդվածում շեշտվում է, որ չնայած հրապարակային հայտարարություններին՝ Ռուսաստանը ՀՀ տարածքով «միջանցքի» հիմնական շահառուն է, որովհետև թե՛ Ադրբեջանը, թե՛ Թուրքիան, թե՛ Ռուսաստանն ուզում են, որ ՀՀ տարածքով լինի միջանցք՝ ՌԴ վերահսկողության ներքո։

Ազգային ժողովի նախագահ Ալեն Սիմոնյանը Factor TV-ի հարցին ի պատասխան՝ հայտարարեց՝ ինքը տեղյակ չէ, թե Ռուսաստանը ցանկանում է Հայաստանը դարձնել Ռուսաստան-Բելառուս Միութենական պետության կամ հենց Դաշնության մաս։

Դավիթ Ստեփանյանի խոսքով՝ Հայաստանին իսկապես սպառնում է Միութենական պետության կազմի մեջ մտնելու վտանգը։ Ըստ նրա՝ Պուտինն անձամբ է Փաշինյանին նման առաջարկ արել նրա ՌԴ վերջին այցի ժամանակ։

Փաշինյանի թիմակիցներն այսօր խորհրդարանում այնքան էլ պատրաստակամ չէին մեկնաբանել «Հայկական ժամանակ»-ում  «Հավաստի Աղբյուր» ստորագրությամբ հրապարակումները, բայց  հոդվածներում առկա պնդումների ճշմարտացիությունը հակված չէին կասկածի տակ դնել․ բացառություն էր Ալեն Սիմոնյանը։

«Ճիշտ չի իշխանության հետ առնչվող լրատվամիջոցում լրագրողի գրածը վերագրել իշխանություններին։ Ես այդ աղբյուրը հավաստի չեմ համարում, ես նման ինֆորմացա չունեմ»,- ասաց նա։

«Հայաստան» խմբակցության պատգամավոր Գեղամ Մանուկյանը կարծում է, որ այդ հոդվածներով պետք է ԱԱԾ-ն զբաղվի։ Ըստ ընդդիմադիր պատգամավորի՝ թշնամական պետությանն աջակցող հրապարակումներ են արվում։

«Հայկական ժամանակ»-ը երեկ էլ բանակցային գործընթացին առնչվող մանրամասների վերաբերյալ էր բացահայտումներ արել։  Հրապարակվել էին կետեր այն մասին, թե ինչ պահանջներ ունի Ադրբեջանը՝ Լեռնային Ղարաբաղի պաշտպանության բանակի լուծարում, Լեռնային Ղարաբաղի ճանաչում Ադրբեջանի կազմում՝ զրո կարգավիճակով, միջանցք Հայաստանի տարածքով։ Այս հրապարակումը հաջորդել էր կիրակի Ժնևում կայացած Միրզոյան-Բայրամով հանդիպմանը։ Արդյո՞ք այս կետերը քննարկվել են՝ պաշտոնական Երևանը չի բացահայտում։ Ալեն Սիմոնյանը, որի համոզմամբ՝ Արցախ բառը չպետք է լինի Հայաստանի և Ադրբեջանի միջև կնքվելիք խաղաղության պայմանագրի տեքստում, նշում է՝ բացահայտումների ժամանակը չէ։

Երևանից հնչող պաշտոնական և ոչ պաշտոնական տեսակետներին արձագանքել են նաև Արցախի իշխանությունները․ Ստեփանակերտն անընդունելի է համարում Հայաստան-Ադրբեջան խաղաղության պայմանագրից Արցախի հիմնախնդիրը դուրս թողնելու տարբերակը։

Մանրամասները՝ տեսանյութում։

Նարեկ Կիրակոսյան