Քաղաքականություն
04.10.2022 | 21:31
Թուրքիան դիմել է Ռուսաստանին՝ խնդրելով բնական գազի մատակարարման դիմաց վճարումների մի մասը հետաձգել մինչև 2024 թվականը։ Այս մասին հայտնում է Bloomberg-ը՝ հղում անելով տեղեկացված աղբյուրներին, փոխանցում է ՌԻԱ Նովոստին։
«Թուրքական պետական էներգակիրներ ներկրող Boru Hatlari ile Petrol Tasima AS-ը կամ Botas-ը ձգտում է մինչև 2024 թվականը հետաձգել վճարումների մի մասը»,- գրում է լրատվամիջոցը։
Գործակալության զրուցակիցները, միաժամանակ, նշել են, որ դեռևս պարզ չէ՝ արդյո՞ք բանակցությունները հաջողությամբ կավարտվեն։
Ըստ ԶԼՄ-ների՝ Թուրքիայի կախվածությունը էներգակիրների ներմուծումից մեծացրել է ճնշումն ազգային արժույթի և բյուջեի վրա։ Տարեսկզբից թուրքական լիրան ավելի քան 28 տոկոսով արժեզրկվել է դոլարի նկատմամբ։ Բացի այդ, Թուրքիայի առևտրային դեֆիցիտն օգոստոսին աճել է ավելի քան երկու անգամ՝ նախորդ տարվա նույն ամսվա հետ համեմատ, և հասել է 11,2 մլրդ դոլարի։
Ավելի վաղ էլ գործակալությունը գրել էր, որ Թուրքիայի նախագահ Ռեջեփ Թայիփ Էրդողանը ձգտելու է հասնել ռուսական գազի 25 տոկոս զեղչին։ Ավելի ուշ Մոսկվան ու Անկարան պայմանավորվել էին, որ վերջինը մատակարարվող ռուսական գազի 25 տոկոսի դիմաց վճարելու է ռուբլով։
Էմմա Չոբանյան
