18.08.2026 | 21:12
Ապօրինի ձեռնարկատիրության դեպք է բացահայտել․ առգրավվել է մեծ քանակի կեղծ խմիչք. ՆԳՆ
Թուրքիային անհրաժեշտ է շուտափույթ նոր Սահմանադրություն ընդունել․ արդարադատության նախարար
Քաղաքականություն
03.10.2022 | 17:47
Թուրքիայի արդարադատության նախարար Բեքիր Բոզդաղը հայտարարել է, որ պետք է հնարավորինս շուտ ընդունել նոր Սահմանադրությունը, որը կփոխարինի գործող Սահմանադրությանը, որն ընդունվել է 1982 թվականին՝ 1980 թվականի ռազմական հեղաշրջումից հետո։
«Թուրքիային հրատապ անհրաժեշտ է նոր Սահմանադրություն։ Առանց դրա չի կարող լինել նոր Թուրքիա։ Դրա ընդունմամբ մենք նոր էջ կբացենք երկրի պատմության մեջ»,- ասել է նախարարը, որի ելույթը ցուցադրվել է TRT հեռուստաալիքով, գրում է ՏԱՍՍ-ը։
Թուրքիայի Արդարադատության նախարարության ղեկավարը նշել է, որ ավելի վաղ մի քանի փորձ է արվել նոր Սահմանադրություն մշակելու ուղղությամբ, սակայն դրանք արդյունք չեն տվել։
«Թուրքիան վաղ թե ուշ կընդունի նոր Սահմանադրությունը: Երկրին անհրաժեշտ է հիմնական օրենք, որը կընդունվի ժողովրդավարական պայմաններում և կպաշտպանի բոլորի շահերը»,- ասել է Բոզդաղը՝ հիշեցնելով, որ Թուրքիայի նախկին սահմանադրություններն ընդունվել են ռազմական հեղաշրջումներից հետո։
Նախագահ Ռեջեփ Թայիփ Էրդողանը բազմիցս խոսել է Թուրքիայի համար նոր Սահմանադրության ընդունման անհրաժեշտության մասին։ Նրա կարծիքով՝ նոր հիմնական օրենքը պետք է ընդունվի մինչև 2023 թվականը, երբ Թուրքիան կնշի Հանրապետության հռչակման 100-ամյակը։
Տաթև Ֆռանգյան
