28.06.2026 | 03:11
ԱԱ-2026. Անգլիան ու Խորվաթիան հաղթեցին և կխաղան փլեյ-օֆֆում. ՏԵՍԱՆՅՈՒԹ
ԵՄ-ն անտեսում է Բրյուսելի հետ էներգետիկ գործարքում Ադրբեջանի կոռուպցիայի ռիսկը. EURACTIV
Քաղաքականություն
03.10.2022 | 21:57
Քանի որ ԵՄ բանակցությունները՝ կենտրոնական, արևելյան Եվրոպայի ու Բալկանների համար ռուսական գազից ազատվելու համար, բերել են Ադրբեջանից վառելիքի ներմուծման ծավալների ավելացման, թերահավատները զգուշացնում են, որ այն գին ունի՝ ավելանում է կախվածությունը երկրից, որը Եվրոպայում ունի կաշառակերության և կոռուպցիայի նորագույն պատմություն ու ներգրավված է հակամարտությունում, գրում է EURACTIV-ը։
Նշվում է, որ նախորդ շաբաթ Հունաստան-Բուլղարիա գազային փոխկապակցիչի բացման արարողության ժամանակ Եվրահանձնաժողովի նախագահ Ուրսուլա ֆոն դեր Լեյենը հայտարարել էր, որ կապը, որը կնպաստի ադրբեջանական գազի մատակարարումների ավելացմանը Սոֆիա և տարածաշրջան, «կփոխի խաղը» և «Ռուսաստանից ազատություն կբերի տարածաշրջանին»։
Ըստ լրատվամիջոցների՝ թերահավատները նախազգուշացնում են ռիսկերի մասին, որոնք կապված են հակամարտության մեջ ներքաշված և Եվրոպայում կաշառակերության ու կոռուպցիայի նորագույն պատմության հետ կապված երկրի հետ։
Ներկայում Ադրբեջանը TANAP-ով տարեկան 16 միլիարդ խորանարդ մետր գազ է տարանցում Թուրքիայի, Հունաստանի, Բուլղարիայի և Իտալիայի համար: Այնուամենայնիվ, ծրագրեր կան կրկնապատկել այս հզորությունը՝ հասցնելով տարեկան 20 միլիարդ խորանարդ մետրի: Հունգարիան, Ռումինիան և Սլովակիան նույնպես ցանկանում են հարմարեցնել իրենց ցանցերը ադրբեջանական գազի ներմուծման համար։
Չեխիայի Pirate կուսակցությունից Եվրախորհրդարանի պատգամավոր Մարկետա Գրեգորովան, մասնավորապես, կասկածներ ունի ԵՄ-ի և Ադրբեջանի միջև ստորագրված գազային հուշագրի հետ կապված։ Ըստ նրա՝ ԵՄ-ն պետք է դասեր քաղի Ռուսաստանի հետ ունեցած իր նախկին փորձից, այլ ոչ թե մեծացնի իր կախվածությունը բռնապետություններից։ Պատգամավորը նշել է, որ գործարքը նախատեսում է երկարատև համագործակցություն՝ առանց ժամկետների ու վերահսկման մեխանիզմների, որը նա անվանում է վտանգավոր նախադեպ։
Եվրոպացի գործիչն ասել է, որ Ադրբեջանի քաղաքական գործիչների ու դիվանագետների ներկայությունը Բրյուսելում և Ստրասբուրգում վերջին շաբաթներին ակտիվացնել է։ Նա նշել է, որ հանդիպման ժամանակ Հայաստանի հետ վերջին էսկալացիան քննարկելու փոխարեն՝ «ի զարմանս իրեն, նրանք ցանկացել են սկսել անդրադառնալ գազին և ամրապնդվող համագործակցությանը»:
«Ես նրանց համար հստակեցրի, որ քանի դեռ արյուն է թափվում, ինձ չի հետաքրքում, թե ի՞նչ հուշագիր է ստորագրվել Եվրահանձնաժողովի հետ։ Դրանք չեն ընդունվում ինքնաբերաբար Եվրախորհրդարանում»,- ասել է նա լրատվամիջոցի հետ զրույցում։
Եվրահանձնաժողովը չի պատասխանել EURACTIV-ի խնդրանքին՝ մեկնաբանություններ տալ հարավկովկասյան երկրի հետ գործարքում վերահսկողության մեխանիզմների բացակայության վերաբերյալ հրապարակման առնչությամբ։
Bankwatch-ի ռազմավարական ոլորտի ղեկավար Ֆիդանկա Մաքգրաթը EURACTIV-ին ասել է. «Պետք է կասկածի տակ դնել Եվրահանձնաժողովի և ԵՄ կառավարությունների իմաստությունը, երբ նրանց կախվածությունը Վլադիմիր Պուտինի ճնշող և պատերազմող ռեժիմից փոխարինում են ավտորիտար և ռազմատենչ Ադրբեջանին աճող ապավինմամբ»։
Կազմակերպության ներկայացուցիչը նաև նշել է, որ ադրբեջանական գազն իրական այլընտրանք չէ ռուսական գազին, քանի որ կապված է «Լուկօյլ»-ի հետ, որը գազ է արդյունահանում երկրում և տարբեր շահեր ունի իր գազի ոլորտում:
Լրատվամիջոցը մանրամասն ներկայացնում է նաև Ադրբեջանի կոռուպցիոն պատմությունը ԵՄ գազային գործարքներում, ինչպես նաև «Ադրբեջանական լվացքատան» հայտնի դեպքը, թե ինչպես էր Բաքուն «գնել» եվրոպացի տարբեր պատգամավորների ու գործիչների։
Էմմա Չոբանյան
